Aıgúl Ádilgereıqzynyń aıtýynsha, oblysta jańa 2020-2021 oqý jylyna daıyndyq júıeli júrip jatyr.
– Mektepterdegi oqytý formatyn anyqtaý, oqýshylar men pedagogtardy kompıýtermen qamtamasyz etý baǵytyndaǵy sharalar jasalýda. Aldyn ala jasalǵan taldaýlarǵa baılanysty epıdemıologııalyq jaǵdaıy turaqty shalǵaı aýyldyq eldi mekenderdiń mektepterinde balalardy shtattyq rejımde, ıaǵnı ádettegideı oqytý josparlanǵan, – dedi basqarma basshysy.
Iаǵnı shalǵaı aýyldardaǵy shaǵyn 220 mektepte qońyraý soǵylyp, 16251 oqýshy qadimgideı partada otyryp bilim almaq. Árıne, ol jerlerde saqtyq, qaýipsizdik sharalary barynsha qatań saqtalatyn bolady.
Degenmen, oqýshylardyń deni oblys ortalyǵynda, iri eldimekenderde turady. Sondyqtan qalalarda jáne oqýshy kontıngenti kóp aýyldyq mektepterde qashyqtyqtan oqytý qarastyrylǵan. Mundaı 160 mektepte 90 425 oqýshy oqıdy.
– О́tken oqý jylynyń sońǵy toqsanyndaǵy tájirıbe kórsetkendeı, bastaýysh synyp oqýshylary úshin qashyqtan oqýdyń qıyndyǵy baıqaldy. Ata-analar ul-qyzynyń barynsha qaýipsizdik sharalaryn saqtap, mektepte oqyǵanyn qalap otyr. Sondyqtan qashyqtan oqytylatyn mektepterde bastaýysh synyptar úshin kezekshi synyptar ashý josparlanýda. Bul degenińiz – 1376 synyp, 17 myńnan astam oqýshy, – deıdi Aıgúl Myńbaeva.
Qashyqtan oqýdyń sapasy bilim ordalarynyń tehnıkalyq múmkindigine tikeleı baılanysty. Sondyqtan mektepterdegi kompıýterlik qurylǵylardy jańartý qolǵa alynǵan. Oblys boıynsha bıyl únemdelgen qarajat esebinen 1454 kompıýter alynǵan eken. Qosymsha 1922 kompıýter satyp alý josparlanypty. Al az qamtylǵan, kópbalaly otbasy oqýshylary byltyrǵydaı mektep kompıýterlerimen ýaqytsha qamtamasyz etiledi.
Taǵy bir kúrdeli másele – mektepterdiń ınternet jyldamdyǵyn kóterý. Basqarma basshysynyń aıtýynsha, qashyqtan oqytylatyn barlyq mektepti ınternet platformalaryna qosý boıynsha tıisti oryndarmen kelisim shart jasalyp jatyr eken. Pedagogtardyń IT quzyrettiligin arttyrý, túrli ınternet platformalardy paıdalaný, bilim alýshylarmen keri baılanysty tıimdi uıymdastyrý maqsatynda oqytý semınarlary júrgizilmek. Pán muǵalimderin ádistemelik qoldaý maqsatynda barlyq pán boıynsha tirek konspektiler men beıne kontentter daıyndalyp jatyr.
– Oblystyń 12 262 pedagogy Qazaqstan Respýblıkasy Bilim jáne ǵylym mınıstrligi uıymdastyrǵan qashyqtan oqytý máselelerine arnalǵan kýrsta oqydy. 2020-2021 oqý jylyna oqýlyqtar men oqý-ádistemelik keshendermen qamtamasyz etý maqsatynda jergilikti bıýdjetten 2839,5 mln. teńge qarajat bólindi. Bul qarjynyń 39,3 mln teńgesi bul oqýlyqtardy ár mektepke, ár oqýshyǵa jetkizý úshin tasymaldaý shyǵyndaryna qarastyryldy, – deıdi Aıgúl Myńbaeva.
Aıtpaqshy, bıyl Batys Qazaqstan oblysynda 32 bilim berý nysanyn kúrdeli jóndeý úshin 9,4 mlrd teńge bólingen bolatyn.
