Keńeske sybaılas jemqorlyqqa qarsy is-qımyl departamenti basshysynyń birinshi orynbasary Jazıra Jylqyshıeva, joba jetekshisi, qalalyq máslıhat depýtaty Mıras Shekenov, aýdan ákimderiniń keńesshileri, qalalyq basqarma basshylary qatysty. Ashyq bıýdjetterdiń ınteraktıvti kartasyn ózekti etý, dári-dármekterdiń baǵasy boıynsha dárihanalarǵa júrgizilgen monıtorıng nátıjeleri, TKSh-ny jańǵyrtý baǵdarlamasynyń monıtorıngi, qaladaǵy ruqsat etilmegen qoqys oryndary sekildi birqatar másele talqylandy.
Sondaı-aq, basqarmalardyń "Sapaly jol" jobasy aıasynda jol qurylysy kezinde ýákiletti organdardyń zań buzýshylyqtardy joıý jónindegi baıandamalary tyńdaldy. Máslıhat depýtaty Mıras Shekenov dárihanalardyń monıtorıng nátıjeleri men "Astana – adaldyq alańy" jobasy menedjerleriniń gýmanıtarlyq kómek jetkizý boıynsha júrgizgen jumystaryna egjeı-tegjeıli toqtaldy. Shilde aıynyń basynan bastap jumys toptary QR Parlamenti Májilisiniń jáne qalalyq máslıhat depýtattarymen, sybaılas jemqorlyqqa qarsy is-qımyl departamenti qyzmetkerlerimen, taýarlar men kórsetiletin qyzmetterdiń sapasy men qaýipsizdigin baqylaý departamenti, Jastar jáne ishki saıasat basqarmasy ókilderimen, eriktilermen, quqyq qorǵaý organdarynyń, aýdandyq ákimdikterdiń ókilderimen jáne qoǵam belsendilerimen birlesip, kúndelikti reıdter júrgizedi.
"Búgingi tańda 50-ge tarta dárihana tekserildi, onda dári-dármekterdiń baǵasyn kótergen 16 derek, jeke tulǵalardyń dári-dármekterdi satýy jáne basqa da birqatar quqyq buzýshylyqtar anyqtalyp, oǵan qatysty tıisti sharalar qabyldandy", – dedi Mıras Shekenov.
Keńes qorytyndysy boıynsha, Baqtııar Maken qalanyń áleýmettik mańyzy bar nysandaryna, onyń ishinde ashyq bıýdjetterdiń ınteraktıvti kartasy sheńberinde turaqty negizde monıtorıng júrgizýdi tapsyrdy.
Sondaı-aq, oqý oryndary men balabaqshalardyń jańa oqý jylyna daıyndyǵyn qadaǵalaıtyn monıtorıng júrgizip, aýdan turǵyndary men keńesshilerdiń jumysyn jandandyrý tapsyryldy.
