Oıyn bastalmas buryn birqatar fýtbol mamandary Gvardıola baptaıtyn MS ujymyn úzdik tórt komandanyń qataryna qosyp qoıǵan edi. Alaıda, olardyń bul jolǵy boljamyn kóbinese qarymta shabýyldarmen gol soqqan «Lıon» kúl-parshasyn shyǵardy.
«Lıon» birinshi bolyp esep ashty. Oıynnyń 24 mınýtynda Korne aıyp alańynyń syrtynda sol aıaqpen qıystyryp teýip, komandasyn alǵa shyǵardy. 69 mınýtta MS sapynan Belgııa quramasynyń tájirıbeli fýtbolshysy Kevın De Brıýıne aıyp alańynyń ishinde qaqpanyń oń jaq buryshyn dál kózdep, esepti teńestirdi. Al oıynnyń 79 jáne 87 mınýttarynda fransýz shabýylshysy Mýssa Dembele dýbl avtory atanyp, bul kezdesýge núkte qoıdy. Esep – 3:1, «Lıon» sońǵy bolyp jartylaı fınalǵa joldama aldy.
Chempıondar lıgasynyń jartylaı fınalynda (18 tamyz) «Leıpsıg» – PSJ ózara myqtyny anyqtasa, 19 tamyzda «Lıon» jartylaı fınalda keshe ǵana «Barselonany» 8:2 esebimen oısyrata jeńgen azýly «Bavarııa» komandasymen kezdesedi.
Oıyn statıstıkasy:
«Manchester Sıtı» – «Lıon» 1-3
Dopty ıelik etý – 67% – 33%; soqqy – 19:7; dál soqqy – 8:6; aıyp soqqy – 15:13; buryshtama – 11:3; ofsaıd – 0:0; sary qaǵaz – 2:2; oıynshy almastyrý – 2:4.
«Manchester Sıtı»: qaqpashy – Ederson; qorǵaýshylar – Kanselý, Laport, Garsııa, Ýoker; jartylaı qorǵaýshylar – Rodrı, Gıýndogan, Fernandınıý; shabýylshy – Sterlıng, Gabrıel Jezýs, De Brıýıne.
«Lıon»: qaqpashy – Lopesh; qorǵaýshylar – Denaıer, Marselo, Markal; jartylaı qorǵaýshylar – Dıýbýa, Kakere, Brýno, Aýar, Korne; shabýylshylar – Depaı, Ekambı.
