Ol «V» sanatyndaǵy júrgizýshi kýáligińiz bolsa jalaqyńyz joǵary bolady degen habarlandyrýdy ınternetten kórgen. Kórsetilgen nómirge telefon soqsa ar jaǵyndaǵy áıel barynsha bııazy sóılep, onyń bul orynǵa sáıkes keletinin aıtqan. Alaıda, jumysqa ornalasý úshin sanıtarlyq kitapsha jáne densaýlyq jaǵdaıy týraly medısınalyq anyqtama usynýy qajet ekenin aıtqan. Al olardyń bárin tezirek jasaý úshin myna esepshotqa aqsha aýdarýyńyz kerek degen. Karantın ýaqytynda kerekti anyqtamalardy alýdyń qıyn ekenin eskergen azamat kórsetilgen esepshotqa talap etken somany aýdaryp-aq jibergen eken...
Keıin telefonnyń ar jaǵyndaǵy «qamqorshy» elektrondy ruqsat qaǵazyn ázirleý úshin qosymsha aqy suraǵan, biraq bul aqshasynyń joqtyǵyn aıtyp, betpe-bet kezdesýdi usynǵan eken... Osydan keıin alaıaq baılanysty úzip, telefondy óshirip tastaıdy. Er adamǵa polısııaǵa júginýge týra keledi.
Internet-alaıaqtyqtyń taǵy bir jıi kezdesetin tásili bar. Adamdarǵa belgisiz bireýler habarlasyp, olardyń bank kartalaryn bireýler buzyp, ıemdenbekshi ekenin aıtyp qorqytady. Osyndaı aılaǵa 48 jastaǵy oblys turǵyny aldanyp qalǵan. Sypaıy jáne senimdi kóringen adamǵa áıel senip, onyń barlyq «nusqaýlaryn» oryndaǵan: depozıt shotynan kartaǵa 130 myń teńgeni aýdaryp, telefon arqyly karta nómirin aıtyp bergen. Keıin qaskóıdiń quryǵyna túsip qalǵanyna kózi jetip, polısııaǵa júgingen. Qazirgi ýaqytta polıseıler qaskóılerdi anyqtaý boıynsha jedel-profılaktıkalyq is-sharalar júrgizýde.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
