Búgin túnde Eýropa lıgasynyń jartylaı fınaldyq oıyndary aıasynda «Inter» (Italııa) «Shahterge» (Ýkraına) qarsy alańǵa shyǵady. Atalǵan kezdesýdi «Qazsport» telearnasy (Nur-Sultan ýaqytymen saǵat 00:50-de) kórsetedi.
Qatarynan on oıynda jeńilis kórmegen Mılannyń «Inter» komandasy bul joly da jeńisti jolyn jalǵastyrǵysy keletini anyq. Alaıda mılandyqtardyń qarsylasy «Shahter» bıylǵy Eýropa lıgasyndaǵy myqty ujymdardyń biri. Sondyqtan mılandyqtar úshin bul kezdesý qaı jaǵynan alyp qarasaq ta qıynǵa soǵady. Oıyn aldynda «Interdiń» bas jattyqtyrýshy Antonıo Konte bylaı depti: «Biz «Shahterdi» qurmetteýimiz kerek. Biz birneshe jyl boıy bıik jetistikke jetken, jaqsy daıyndalǵan komandamen oınaımyz. «Shahter» – Eýropa lıgasyndaǵy eń myqty komanda. Biraq biz de jartylaı fınalǵa kezdeısoq jetken joqpyz, fınalǵa ótkimiz keledi».
Kóbinese brazılııalyq oıynshylarǵa senim artatyn «Shahter» (komandada 10 brazılııalyq oıynshy bar) jartylaı fınalǵa jetkennen keıin kóp mamandar doneskiniń komandasyn favorıtter qataryna qosa bastady. Tipti, 2008/2009 jylǵy jetistigin qaıtalaýy múmkin degender de bar. Biraq barlyǵy ýkraınalyqtardyń óz qoldarynda. Eger de olar «Volfsbýrg» (3:0), «Bazelge» (4:1) qarsy shyqqandaı oınasa, onda olar sózsiz fınalda. Bul jaıynda komandanyń bas bapkeri de bylaı deıdi: «Bul matchqa biz ádettegideı daıyndalyp jatyrmyz. О́te kúshti komandamen kezdesetinimizdi bilemiz. Konte bapker ártúrli kúrdeli taktıkaǵa qura biletin bapker. Alaıda, biz oǵan daıynbyz».
Statıstıka
– qarsylastar 2005/06 Chempıondar lıgasynyń irikteý kezeńinde ózara oınady: «Inter» qonaqta 2:0 esebimen jeńiske jetti, Mılanda 1:1 esebimen teń tústi;
– «Inter» ÝEFA reıtınginde 39-orynda, «Shahter» – 14-orynda;
– «Inter» Chempıondar lıgasynda óz tobynda úshinshi oryn aldy, sodan keıin «Lýdogores», «Hetafe» jáne «Baıerdi» Eýropa lıgasynan shyǵardy»;
– «Shahter» Chempıondar lıgasynda óz tobynda úshinshi orynǵa ıe boldy, sodan keıin Eýropa lıgasynda «Benfıka», «Volfsbýrg» jáne «Bazeldi» artta qaldyrdy;
– «Inter» ÝEFA kýbogyn úsh ret jeńip aldy;
– «Shahter» 2008/09 maýsymda ÝEFA kýbogyn jeńip aldy;
– «Inter» týrnırdiń jartylaı fınalynda jeti ret oınap, tórt ret fınalǵa shyqty;
– «Shahter» jartylaı fınalǵa eki ret jetip, bir ret fınalǵa shyqty;
Egemen.kz boljamy
«Shahterdiń» shabýylshylary óte saýatty oınasa, «Interde» fýtbol «juldyzdary» jınalǵan. Munyń bári bizge eki komanda arasyndaǵy match qyzyqty ótetinine ýáde etedi. Biraq, qıyn tańdaýǵa qaramastan «Shahterdiń» fınalǵa shyǵatynyna senemiz.
