Jol-kólik oqıǵasy shamamen saǵat túngi on ekiden ótkende Beskól aýyly mańynda Nur-Sultan – Petropavl avtojolynyń 466 shaqyrymynda oryn alǵan. 40 jasar júrgizýshiniń ómirin tek qaýipsizdik jastyǵy saqtap qalǵan. Al jaryqqa kózi qaryǵyp, qasha almaı qalǵan elik alǵan jaraqatynan sol jerde ólgen. Júrgizýshi jol-kólik oqıǵasynan qatty shoshynǵany sózsiz. Ol kóp ýaqyt tilge kelmeı, otyryp qalǵan eken. Kóligi de barynsha zaqymdanǵan, onyń sýreti de jarııalandy.
Osy jol-kólik oqıǵasy týraly kóptegen adamdar oqypty. Solardyń arasynan bir azamattar SQO Polısııa departamentiniń baspasóz qyzmetine habarlasyp, zardap shegýshiniń baılanys telefonynyń nómirin suraıdy. Mundaı aqparat qupııa bolyp sanalatyndyqtan baspasóz qyzmeti bere qoımaıdy, biraq qońyraý shalýshynyń nıetin bilgennen keıin kólik júrgizýshisiniń telefon nómiri beriledi. Qońyraý shalýshy azamat Skoda Club Astana klýbynyń múshesi, Nur-Sultan qalasynyń turǵyny Darhan Qalybaı eken. Ol ózderiniń klýb múshelerimen aqyldasyp, Soltústik Qazaqstanda zardap shekken júrgizýshige materıaldyq kómek kórsetý týraly sheshim qabyldaǵandaryn jetkizedi.
Mundaı adamgershilik qadam estigen jannyń báriniń júregine jylý uıalatty. "Júrgizýshilerdiń birlesip, múlde tanymaıtyn adamǵa kómek kórsetýge nıettenýi jıi kezdesetin jaǵdaı emes. Sońǵy kezde oryn alǵan jaǵdaılar qundylyqtarǵa jańasha qarap, eshqandaı maqsatsyz kómek kórsetý men qoldaýdy alǵa shyǵarýǵa áser etti dep oılaımyn. Bul óte tamasha bastama...", deıdi SQO PD Jergilikti polısııa qyzmeti basqarmasy bastyǵynyń orynbasary, polısııa podpolkovnıgi Grıgorıı Tysh.
Avtoklýb músheleri ózderiniń jınaǵan kómek qarajattaryn júrgizýshiniń kartasyna aýdarǵan eken. Onyń ózi de Petropavl qalasyna jumystarymen kelgen Nur-Sultan qalasynyń turǵyny bolyp shyqty. Beıtanys adamdardyń qoldaýy ol úshin kútpegen qýanysh boldy. Sondyqtan onyń mashınasyn búldirip alǵan, dene jaraqatyn shekken qaıǵysy sál de bolsa azaıyp qaldy.
Astanalyq jigitter bul kómekterimen ǵana shektelmeı, astanadaǵy "ProVag" tehnıkalyq qyzmet kórsetý ortalyǵymen kóliktiń qozǵalatyn jáne tehnıkalyq bóligin jóndeý jasaǵanda aqyny jeńildetilgen tarıfpen alýǵa kelisipti. Mundaı jaǵdaı zardap shegýshi azamattyń qýanyshyn eseleı tústi. Qoǵamymyzda osyndaı aq júrekti, abzal jandardyń bolǵany, bizdińshe barlyq qazaqstandyqtardy da qýantýǵa tıis.
