«Astananyń» keshegi jeńilisine fýtbol sarapshylary, jankúıerler komandanyń bes aı boıy match ótkizbegeni sebep bolǵanyn, oǵan ishki chempıonatty ótkizýge ruqsat bermegen Bas sanıtar dáriger Aıjan Esmaǵambetova men ózge eldiń ishki chempıonaty jalǵasyp jatqanda, tıisti mekemeden ruqsat ala almaǵan Qazaqstan fýtbol federasııasy men Qazaqstannyń kásipqoı fýtbol lıgasynyń basshylyǵyn kinálap jatyr. Iá, «Dınamoǵa» qarsy oıynda fýtbolshylarǵa oıyn tájirıbesi jetpegeni anyq baıqaldy. Komanda kapıtany, tájirıbeli fýtbolshy degen Dmıtrıı Shomkonyń ózi pas asyrý bylaı tursyn, dopty qabyldaýda óte kóp qatelesti.
Dese de bul oıynda «Astana» «Dınamo Brestten» emes, bas bapker Mıhal Bılek óziniń áriptesi Sergeı Kovalchýkten taktıkalyq jaǵynan jeńildi. Nege deseńiz, «Astana» Stoılov pen Grıgorchýk kezinde bes qorǵaýshy, tórt jartylaı qorǵaýshy jáne bir shabýylshymen oınap, kóbine qarsy shabýyl arqyly qarsylastarynan aılasyn asyryp ketetin. Biraq keshegi matchta Bılek múlde basqa taktıkamen shyqty. Iаǵnı alańǵa tórt qorǵaýshy, tórt jartylaı qorǵaýshy jáne eki shabýylshyny shyǵardy. Al Sergeı Kovalchýk «Astananyń» burynǵy taktıkasyn, ıaǵnı óz taktıkamyzdy ózimizge qoldanyp, qarsy shabýyl arqyly-aq «Astananyń» tas-talqanyn shyǵardy. Bul – bir.
Ekinshiden, Bılek alańǵa fýtbolshy shyǵarýda da ońbaı qatelesti. Matchtan bir saǵat buryn «Astana» bas bapkeri alańǵa shyǵatyn 11 fýtbolshynyń tizimin jarııalaǵanda kókeıimizde «nege bul oıynshylar?» degen suraq turdy. О́ıtkeni Bılek negizgi quramnyń birqatar oıynshysyn qosalqy quramda ustap, al qosalqy quramnyń keıbir oıynshysyn birinshi mınýttan bastap alańǵa shyǵarýdy qup kórgen eken. Mysaly, 10 jyldan beri «Astananyń» negizgi qaqpashysy ári kapıtany bolyp kelgen Nenad Erıchti qosalqy quramǵa qaldyryp, onyń ornyna resmı kezdesýdi 2019 jyldyń qarasha aıynda ótkizgen Dmıtrıı Nepogodovty shyǵardy. Dmıtrıı byltyr «Ordabasy» sapynda Eýropa lıgasynda eki match ótkizgeni bolmasa, onyń Eýrokýbok básekelerinde múldem tájirıbesi joq edi. Al Erıch byltyr Eýropa lıgasynyń pleı-off kezeńinde «Astanany» toptyq kezeńge qalaı shyǵarǵanyn jankúıerler jaqsy biledi. Keshegi matchtaǵy alty goldyń kem degende úsh goly Nepogodovtyń qateliginen, tájirıbesizdiginen soǵyldy.
Qorǵanystaǵy oıynshylarǵa keler bolsaq, oń qanattaǵy qorǵaýshy Antonıo Rýkavına match aldyndaǵy jattyǵýda jaraqat alyp qalyp, onyń ornyna jartylaı qorǵaýshy Iýrıı Persýhty shyǵarýǵa májbúr boldy. Ortalyq qorǵaýshylar Ýrosh Radakovıch pen Lýka Shımýnovıch qarsylastyń birde-bir shabýylyna qarsylyq kórsete almady. Jartylaı qorǵaýshylar Ivan Maevskıı men Maks Ebong qarsylastyń shabýylyn toqtatý bylaı tursyn, shabýyldaǵy jigitterge durys pas jetkize almady.
Tablodaǵy esep 3:0-ge jetkende ǵana bas bapker Mıhal Bılek fýtbolshy tańdaýda qateleskenin túsinip, 35 mınýtta oınap jarytpaǵan Iýrıı Persýh pen shabýylshy Alekseı Shetkınniń ornyna qos qanatta óner kórsetetin Tıgran Barsegıan men Dorın Rotarıýdy shyǵardy. Osy eki fýtbolshy alańǵa shyqqannan keıin ǵana «Astananyń» oıynyna qan júgire bastady. Tynymsyz shabýyldyń arqasynda qaharman Tomasov esepti qysqartýǵa múmkindik aldy. Ekinshi taımnyń 53 mınýtynda Rotarıý «Astananyń» ekinshi golyn soqqanda jankúıerlerde úmit oty paıda bolǵan edi. Biraq bári biz kútkendeı bola bermeıdi eken. Oıyn aıaqtalǵanǵa deıin alań qojaıyndary eki gol soqsa, 87 mınýtta qorǵaýshy Abzal Beısebekov esepti bir golǵa qysqartty. Qorytyndy esep – 6:3.
Osylaısha «Astana» klýby bıýdjeti ózinen úsh ese tómen «Dınamo Brestten» masqara bolyp jeńildi. Sondaı-aq ekinshi jyl qatarynan Chempıondar lıgasynyń birinshi irikteý kezeńinen ary asa almady. Endi jerlesterimiz ózderi oınap úırengen deńgeıine saı Eýropa lıgasynda baq synaıdy. «Astana» óner kórsetetin ekinshi kezeńniń oıyndary 17 qyrkúıekte ótedi. Bálkim bir aıǵa jýyq ýaqyttyń ishinde elorda komandasy el birinshiliginde birneshe oıyn ótkizip, qajetti deńgeıde oıyn tájirıbesin jınap úlgerer.
Matchtyń qysqasha statıstıkasy:
«Dınamo Brest» – «Astana» 6:3
Gordeıchýk 16, Pechenın 17, Gordeıchýk 22, Sedko 37, Dıallo 55, 90 – Tomasov 45, Rotarıý 53, Beısebekov 87.
Dopty ıelik etý – 49% – 51%; soqqy – 15:21; dál soqqy – 8:8; buryshtama – 3:10; ofsaıd – 3:1; sary qaǵaz – 1:0; oıynshy almastyrý – 3:2.
«Dınamo Brest»: qaqpashy – Ignatovıch; qorǵaýshylar – Pechenın, Gabı, Hacherıdı, Iýzepchýk; jartylaı qorǵaýshylar – Sedko, Kıslıak (kapıtan) (Krıves), Tve; shabýylshylar – Gordeıchýk (Savıskıı), Mılevskıı (Bykov), Dıallo.
«Astana»: qaqpashy – Nepogodov; qorǵaýshylar – Persýh (Barsegıan), Shımýnovıch, Radakovıch, Shomko; jartylaı qorǵaýshylar – Maevskıı, Tomasov, Ebong, P.Sotırıý, Beısebekov; shabýylshy – Shetkın (D.Rotarıý).
