Álemniń birqatar beldi ziltemirshileri qatysatyn jarysta Qazaqstannyń qos óreni baq synaıdy. Olar – Zúlfııa Chınshanlo men Ibragım Bersanov. Bul sportshylardyń ekeýiniń de esimi jankúıerlerge jaqsy tanys. 55 kılo salmaqta óner kórsetetin Chınshanlonyń álemniń úsh dúrkin chempıony jáne Azııa oıyndarynyń eki dúrkin kúmis júldegeri degen ataǵy bar. 2012 jyly ol London Olımpıadasynda altynnan alqa taǵynǵan edi. Alaıda dopıng daýyna baılanysty Zúlfııa ǵalamdyq dodanyń bas júldesinen aıyryldy. Bersanov – erlerdiń Azııa chempıonaty men jastar arasyndaǵy álem birinshiliginiń júldegeri. Ol 109 kılo salmaqta kúsh synasady.
– Árıne, jarys jolyna shyǵyp, san myń jankúıerdiń kóz aldynda óner kórsetkenge ne jetsin! Biraq kúlli álem jurtshylyǵyn ábigerge salǵan koronavırýstiń kesirinen ázirge ondaı múmkindik bolmaı tur. Sol sebepti de onlaın týrnırlerge qatysýǵa májbúrmiz. Desek te únemi babyńdy baıqap, óz múmkindigińdi shamalap kórý úshin bul da jaman emes. Olaı bolsa, Tashkenttegi týrnırde qos jerlesimiz el senimin aqtaıdy dep oılaımyn, – deıdi Qazaqstan ulttyq quramasynyń bas bapkeri Baqyt Ahmetov.
