Sondaı-aq kartop pen kókónis, mal azyǵyn ósirý baǵytynda da ilgerileýshilik bar. Jerden óngen yryzdyqty jınaýǵa 8 myńnan astam astyq kombaındary jumyldyrylsa, olardyń 3,5 myńnan astamy jańa zamanǵy ónimdi tehnıka. Osy arada oblystaǵy mashına-traktor parkiniń ər jyl saıyn jańartylyp kele jatqanyn aıta ketýge bolady. Məselen bıyl 67 kombaın, 219 traktor, 41 astyq kesheni satylyp alyndy. Əzirge 654 myń gektar alqaptyń egini oryldy. Gektar berekesi 9,4 sentnerden aınalýda. Orylǵan astyqty qabyldap, keptirip, ysyrapsyz saqtaý úshin syıymdylyǵy 4,2 mln tonnany quraıtyn 65 astyq qabyldaý kəsiporny daıyndalǵan bolatyn. Oǵan aýyl sharýashylyǵy qurylymdarynyń astyq saqtaıtyn qoımalarynyń syıymdylyǵyn ústeıtin bolsaq, 6,6 mln tonna astyqty saqtaýǵa tolyq múmkindik bar.
Kúz jaýyn-shashyndy. Ylǵal kóp. Sondyqtan oblysta bir təýlikte 100 myń tonnadan astam astyq keptirýge qaýqary jetetin 240 keptirgish qurylǵylar daıyndaldy. Ər kúni jylǵa azyq bolatyn kúzgi maýsymda dala jumystaryn irkilissiz júrgizý úshin 73 myń tonna kepildendirilgen dızel otyny bólindi. Onyń 40 paıyzdan astamyna tólemaqy tólendi. Qazir aýdandardaǵy termınaldarǵa úzdiksiz tasymaldanýda.
El yryzdyǵy úshin eseli eńbek etip jatqan dıqandarǵa memleket tarapynan óte jaqsy qoldaý kórsetilýde. Məselen, osy jyly oblystaǵy aýyl sharýashylyǵy salasyn qoldaýǵa 72,6 mlrd teńge qarajat bólingendigin aıta ketýimiz kerek. Sondaı-aq «Kazagro» ulttyq basqarý holdınginiń qarjy ınstıtýttary arqyly 32,3 mlrd teńge shamasynda qoldaý kórsetildi. Bul kólem 2019 jyly 18,6 mlrd teńge deńgeıinde bolǵan.
«Keń dala» baǵdarlamasy boıynsha «Agrarlyq kredıttik korporasııasy» arqyly 265 aýyl sharýashylyǵy taýar óndirýshilerine 20,9 mlrd teńge kóleminde nesıe berildi. О́tken jylǵy mundaı nesıeniń mólsheri 18,6 mlrd teńge deńgeıinde bolǵan. Aýyldyq jerlerde nətıjeli jumyspen qamtý jəne jappaı kəsipkerlikti damytý maqsatynda 381 taýar óndirýshi 1,5 mlrd teńge nesıege qol jetkizdi.
Bıyl aýyl sharýashylyǵy qurylymdary 37,3 mlrd teńge sýbsıdııaǵa ıe boldy. Qazir mańdaı terimen, aıryqsha kúsh-jigerimen aqyq dəndi aıalap ósirgen oblys dıqandary qolaıly sətti qalt jibermeı, el yryzdyǵyn shashpaı-tókpeı jınap alýǵa bar kúsh-jigerlerin jumyldyrýda.
Aqmola oblysy
