Ańyzǵa bergisiz oıyn «Atletıko» & «Arlandar» – 0:1

Oıynnyń alǵashqy mınýtynda balalarymyz tek aspanǵa aýzy ashylǵan kúıi qarap qaldy. Sebebi «Atletıko» dopty jerge túsirmesten birden shabýylǵa shyǵyp, qaqpamyzǵa birneshe soqqy jasap úlgerdi. Aspannan áýelete kelgen alys pastardy keýdesimen qaǵyp jiberip, kelesi oıynshyǵa pas berip, dopty jerge túsirmeı shyqqan shabýylǵa qarsy qandaı shara qoldana alaryn bilmeı biraz sasqalaqtady. Sebebi ondaı oıynǵa daıyn emes edik. Oıynnyń alǵashqy mınýtynda-aq birneshe nokdaýn alǵandaı kúı keship qaldyq. Áıteýir balalarymyz tezirek es jııa bildi. Bastan aıaq tek qorǵanysta oınaýǵa máj­búr boldyq. Iаǵnı, oıynnyń kóp bóligi bizdiń jarty alańda boldy. Qaqpamyzǵa keminde tikeleı 20-25 soqqy jasaldy. Al baǵannyń janynan pyshaqpen keskendeı ótken soqqylarda esep joq...

Qaqpashymyz Erasyl da osal emes edi. Komandamyzdaǵy basty senim artyp otyrǵan balamyz. Sol matchta ol ádettegi deńgeıinen asyp, jarqyldap turdy. Eń kóp jumys, salmaq soǵan tústi. Dopqa sekiredi, qulaıdy, qaıta turady. Tynym joq. Bir kezde Erasyldyń basy qaqpanyń baǵanyna soǵylyp, «toh» etken daýys qatty shyqty. Trıbýna óre túregeldi. Ol jerde qozǵalmaı jatyr. Barlyǵymyz jantalasa júgirdik. Júregim
aýzyma tyǵyldy. Ishimnen oıladym bári bitti dep. Anandaı soqqydan ne bas, ne baǵan synýy kerek edi. Barsaq, qaqpanyń syzyǵynda dopty qushaqtap alǵan kúıi Erasyl jatyr. Bir kezde jan-jaǵyna qarady da atyp turda. Biz ań tań. Tóreshi de, dáriger de qaıta-qaıta «bári durys pa?» dep ony aınalshyqtap tekserip jatyr. Eshqandaı zaqym joq.

Osy oqıǵa men úshin áli jumbaq. Alla saqtaımyn dese saqtaıdy eken ǵoı. Dopty syzyqtyń ústinde ustaǵandyqtan gol bolǵan joq. Shamamen 5-6 ne 7-8 santımetr ishke jyljyǵanda gol sanalar edi. Odan bólek, qaqpanyń ústinen ótken soqqylarda esep joq. Biz tek 2-3 shabýyl ǵana jasadyq dep oılaımyn. Sonyń bireýinde, óz jarty alańymyzda olardan dop­ty alyp qoıǵan shabýylshymyz jalǵyz ózi alǵa umtyldy. Se­bebi bári artta edi. Shamamen 70-mı­nýtta. Jantalasyp kele jatyp qu­la­dy. «Qulannyń qasýy­na, myl­tyq­tyń basýy» degendeı, jalǵyz óziniń ábden silesi qa­typ on­syz da qulaýǵa daıyn tur­ǵan sha­býylshymyzdan dop­ty alyp qoıa bergende qulap, aıyp jasa­ǵan­daı bolyp kórindi. Bizge aıyp soq­qy tebý quqyǵy beril­di. Aıyp soqqysy oryndaldy. Dop qaz-qatar qamal bolyp tur­ǵan oıyn­shylardyń arasy­nan, bel tus­tarynan ótip qaqpaǵa kirdi. Gol. Biraq óz kózime ózim sene almaı turmyn. Bir-birine ja­bysyp, qa­mal bolyp turǵan oıyn­shy­lar­dyń arasynan qalaı ótti? Qaqpa­shy da ań-tań. Eshqandaı áreket ja­saı almaı, ornynda turyp qalǵan.

Bul gol bolmaǵanda, biz je­ńi­ler edik. Sebebi balalarymyzdyń ábden sileleri qatyp, sharshap qal­dy. Ádettegi matchtardan 2 ese kóp salmaq tústi. Reaksııa, jyl­damdyq, tehnıka, taktıkalyq turǵydan, uzyn pastar, barlyq ól­shemder boıynsha úlgere alma­ǵan balalarymyzdy 2 taım boıy «Atletıko» qaljyratyp ji­berdi. Tehnıka, taktıka jaǵy túsi­nikti, olarmen básekelese almaı­myz. Biraq fızıkalyq turǵy­dan tótep bere alatyn qaýqa­rymyzǵa qaramastan, tehnıka degenin istetti. Osyndaı jaǵ­daıda, Qudaı qarasqandaı gol bolýy, balalarymyzdy jiger­len­dirip, kúsh jınaýyna sebep bol­dy. Balalarymyzdyń ekinshi tyny­sy ashylǵandaı qaıta atqa qon­dy. Eýropa fýtbolynda soń­ǵy 10-15 mınýtta oıyndary túrlenip, qyza tússe, bizde, kerisinshe, óshe túsýshi edi ǵoı. Son­daı sátte, «At­­letıko» oıyndy qyz­dyra tú­sip, bizdi tópeleı bas­taǵan kez­­de ba­lalarymyzdyń gol­men rýh­tan­ǵany olarǵa qarsy qor­ǵany­symyzdy qaıta kúsheıtip, tótep berýge septesti. «Qazaq rýh­tansa, qamal alady» degen ras eken...

Osy kúnge deıin áli umyt­paı­­myn, sol kezdegi sońǵy 15 mı­nýttyń árbir mınýtyn, sekýndyn qalaı ótkizgenimdi. Aı­nalyp kel­gende búkil komanda jantala­syp tabandylyq tanytty. Sońǵy ysqyryq. Match bitti. Aıaq­qa turý­ǵa shamam kelmeı, jerge qula­dym. Aspanǵa qarap kúl­dim de qaı­ta turdym. Uıattan. Tóre­shige, qar­sy­las komandaǵa baryp aıtqym keldi «Sizder jeń­dińizder. Jeńis­ti sizderge qalaı bersem bolady?» dep. Biraq erlik kór­setken bala­larǵa ne aıtamyn? Balalardyń da kinási joq. Is­pan balalary sekildi standart alań­da jattyqpaǵan, álemdik deń­geı­degi jattyqtyrýshylardan tá­lim almaǵan balalardyń kinási ne?

«Atletıko» jattyqty­rý­shy­­­larynda túr joq. Oryn­dar­­yn­da qozǵalmaı qatyp qal­ǵan. Qy­za­rady, bozarady. Kóz­deri baqy­­raıǵan kúıi tur. О́ńim be, túsim be degendeı. Meń zeń kúı­de tur­ǵanyn baıqa­dym. Olar da jar­­tylaı fınalǵa ótkisi keledi degen­deı. Onyń ús­tine fýt­­boly damymaǵan elden kel­dik dep tóbe­mizden qaraıty­ny bar... Baryp qol­daryn qys­tym. Bala­laryn jubatyp, jiger­­len­dirdim. Men úshin ómirimde esh umytyl­maıtyn match osy boldy...

Fazylbek ÁBSATTARULY