TOBJ tehnologııasy qoldanylady
Komıtet tóraǵasynyń aıtýynsha, qazir keń jolaqty ınternetke 6 459 eldi mekenniń ishinde 4 646-sy qosylǵan. Bul rette osy eldi mekenderde 18,2 mln adam, ıaǵnı halyqtyń 97,3%-y turady.
«Nur Otan partııasynyń saılaýaldy tuǵyrnamasyna sáıkes jyl sońyna deıin 250 jáne odan da kóp adam turatyn barlyq aýyldyq jerdi ınternetpen qamtamasyz etý mindeti qoıyldy. Qazir 883 aýylda ınternet joq. Osy olqylyqtyń ornyn toltyrý úshin eki joba júzege asyrylýda. Birinshisine kelsek, Talshyqty-optıkalyq baılanys jelisi (TOBJ) tehnologııasy negizinde aımaqtardy keń jolaqty ınternetke qosý josparlanyp otyr», dedi V.Iаroshenko.
Memlekettik organdarǵa basymdyq beriledi
Osy jobanyń aıasynda memleket aýyldy eldi mekenderdegi mektep, aýrýhana jáne ákimdikterge arnalǵan keń jolaqty ınternet qyzmetin satyp almaq. Jyldyń sońyna deıin osy arqyly 1 257 aýyldaǵy 3 718 memlekettik organdy qajetti ınfraqurylymmen qamtý kózdelgen.
«Jyldyń basynda uıaly baılanys operatorlary men bizdiń mınıstrlik arasynda memorandýmǵa qol qoıylyp, sol boıynsha uıaly baılanys operatorlary jobany aıaqtaýǵa jáne 250-den astam adam turatyn barlyq aýyldy 3G nemese 4G qyzmetterimen qamtamasyz etý mindetin aldy. Atalǵan joba arqyly 46 aýyl qamtylyp, qalǵan 882 eldi mekenge ınternet jyldyń aıaǵyna deıin jetýi tıis», dedi Telekommýnıkasııa komıtetiniń tóraǵasy.
Keń jolaqty ınternetten tarshylyq kórmeıdi
Vedomstvo ókiliniń sózine sensek, ekinshi toqsannyń aıaǵyna deıin halyqtyń 99,3%-y keń jolaqty ınternetten tarshylyq kórmeıtin bolady. Sonymen qatar 250-ge jetpeıtin aýyldyq aımaq halqynyń máselesi de qarastyrylyp jatyr.
«Bizdiń vedomstvo Ulttyq ekonomıka mınıstrligi jáne ákimdiktermen birlesip taldaý júrgizdi. Búginde 243 eldi meken iriktelip alyndy, onda keń jolaqty ınternet jelisin qoıý jumystary pysyqtalýda. Jańa oqý jylyna toqtalsaq, biz arnaıy jumys júrgizdik. Internetke baılanysty problemasy bar mektepter men ǵalamtorǵa múldem qosylmaǵan aýyldar sabaqty ádettegi rejimde jalǵastyrady», dedi V.Iаroshenko.
9 myń shaqyrym jeli salyndy
«Qazaqtelekom» AQ basqarma tóraǵasy Qýanyshbek Esekeev bıyl elimizde 9 myń shaqyrymdy quraıtyn talshyqty-optıkalyq baılanys jelisi salynǵanyn jáne oǵan 828 aýyldy qosý josparlanyp otyrǵanyn aıtty.
«Bıyl naýryz-sáýir aılarynda bizdiń baılanys ortalyǵynyń júktemesi artty. Internet arqyly táýligine 2,5 myńnan astam ótinish berildi. Abonentterdiń negizgi bóligi ınternetke qosylady. Bıyl shamamen 9 myń shaqyrymǵa jýyq talshyqty-optıkalyq baılanys jelisin salyp, oǵan elimizdegi 828 aýyldy qosý josparlanyp otyr. Onda shamamen 2 myń memlekettik mekeme, onyń ishinde ákimdikter, aýrýhanalar, mektepter ornalasqan. Optıkalyq talshyqtyń kelýimen bizdiń mobıldi baılanys jelisi de aýylǵa keledi. Aýdan ortalyqtarynyń, aýyldyq eldi mekenderdiń negizgi bóligi ınternetke qosylǵan. Jyl sońyna deıin barlyq aýyldardy ınternetke qosamyz», dedi Q.Esekeev.
Basqarma basshysynyń aıtýynsha, Tele2 jáne Kcell operatorlary bazalyq stansalardy ornatýdy bastady. Kompanııa mamandary aımaqtardy aralap, jańa oqý jylynda baılanys sapasyn arttyrý úshin qajetti jumystarǵa kiriskenin jetkizdi.
