Bul kúnde elimizde kóshi-qonǵa baılanysty memlekettik qyzmetter «bir tereze» qaǵıdaty boıynsha bekitilgen standartqa saı usynylyp otyr. «Azamattarǵa arnalǵan úkimet» MK» KeAQ Almaty qalasy boıynsha fılıalynyń Halyqqa qyzmet kórsetý jónindegi kóshi-qon bólimi sheteldikterge úshinshi jyl qyzmet kórsetýde. Eger buryn rezıdent emes tulǵa 6 túrli uıymǵa (salyq, polısııa, aýrýhana, saqtandyrý kompanııalary, foto salondar jáne bankter) baryp, ár jerde kezekke turýǵa májbúr bolsa, qazir bul qyzmetter bir jerde jáne «bir tereze» qaǵıdaty boıynsha, kedergisiz qyzmet kórsetý standarttaryna saı kórsetiledi.
Bul jerde medısınalyq tekseris pen daktıloskopııadan ótip, saqtandyrý polısin rásimdeýge jáne jeke sáıkestendirý nómirin alýǵa bolady. Buǵan deıin sheteldikter Qazaqstanda jumys isteýge ruqsat alý úshin bes kún júrse, endi ruqsatty bir saǵattyń ishinde rásimdeı alady.
Mysaly, ázerbaıjandyq Naım Abbas Almatyǵa jumys isteý maqsatynda 10 naýryzda kelgen. Búgin ol Almaty mıgrasııalyq HQO-ǵa tirkelý merzimin uzartýǵa keldi. «Bir tereze» ádisimen bir ortalyqtan jumysynyń jyldam bitkenine rıza bolyp, alǵysyn bildirdi. Qyzmet kórsetýshiler de sypaıy, mádenıetti deıdi ol.
«Azamattarǵa arnalǵan úkimettiń Almaty qalasyndaǵy Halyqqa qyzmet kórsetý jónindegi kóshi-qon bólimi «Eńbek mıgranttaryna ruqsattar berý jáne uzartý», «Sheteldikterge JSN qalyptastyrý», «Qazaqstanǵa ýaqytsha keletin sheteldikter men azamattyǵy joq adamdardy tirkeý» memlekettik qyzmet túrlerin usynady. Kúnine ortasha 1000-nan 1200-ge deıin qyzmet alýshylar keledi. Karantın kezinde shekaranyń jabyq turýy sebepti, sheteldikter onshalyqty kóp emes. Jalpy, qazaqstandyq mıgrasııalyq HQO úlgisin TMD elderiniń memlekettik organdary úlgi retinde alyp júr. О́tken jyldary bizdiń tájirıbeni úırenýge birneshe Ortalyq Azııa elderiniń ókilderi kelip ketti», – deıdi «Azamattarǵa arnalǵan úkimet» MK» KeAQ Almaty qalasy boıynsha fılıalynyń dırektory Danııar Qyryqbaev.
Mıgrasııalyq HQO ashylǵaly beri sheteldikterge 216934 qyzmet usynylǵan. Naqtyraq aıtqanda, 2018 jyly – 11970, 2019 jyly – 156 679, bıylǵy jyl basynan beri 48285 qyzmet kórsetilipti.
Eńbek etýge ruqsat etý boıynsha 2019 jyldyń 7 aıynda 41992 qyzmet kórsetilse, osy jyly bul san 29347-ni quraǵan. Ýaqytsha tirkelgender ótken jyly 57897 bolsa, bıyl 22415, JSN qalyptastyrý boıynsha 8756 alynyp, bıyl ol osy ýaqyt aralyǵynda 2589-ge deıin tómendegen.
Esterińizge sala ketsek, «Azamattarǵa arnalǵan úkimet» MK» KeAQ Almaty qalasy boıynsha fılıalynyń Halyqqa qyzmet kórsetý jónindegi kóshi-qon bólimi óz qyzmetin 2018 jyldyń 28 tamyzynan bastady. Áýeli Almaty qalasy, «Nurkent» shaǵyn aýdanynda ashylǵan bolatyn, osy jyldyń 13 shildesinen bastap «Shuǵyla» shaǵyn aýdanyndaǵy «Naýryzbaı aýdany ákimi apparaty» KMM ǵımaratyna kóshken.
ALMATY
