Qoǵam • 07 Qyrkúıek, 2020

Senatorlar aldaǵy jalpy otyrysta tabıǵı qoryqtar týraly zań jobasyn qaraıdy

20 ret kórsetildi

Bul jóninde Máýlen Áshimbaevtyń tóraǵalyǵymen ótken Senat Bıýrosynyń otyrysynda belgili boldy, - dep habarlaıdy   Egemen.kz.

Otyrys barysynda Senat Tóraǵasy Memleket basshysynyń Joldaýynda aıtylǵan basym baǵyttarǵa toqtalyp ótti. Sondaı-aq, Joldaýda memlekettik basqarý júıesine reforma júrgizý, kadr saıasatyn kúsheıtý, sheshimder qabyldaý jáne halyqpen keri baılanys prosesterin jedeldetý qajettigine basa mán berilgenine nazar aýdardy. Odan bólek, Máýlen Áshimbaev Memleket basshysy ekonomıkany qalpyna keltirýdiń jeti basymdyǵyn aıqyndap bergenin, óńirlerdi, jergilikti ózin-ózi basqarýdy damytýǵa, quqyq qorǵaý jáne sot júıesin reformalaýdy jalǵastyrýǵa toqtalǵanyn atap ótti. Senat Tóraǵasynyń aıtýynsha, Joldaýda densaýlyq saqtaý jáne bilim berýge basa nazar aýdarylǵan.

«Joldaýda aıtylǵan basymdyqtardyń bári halyqtyń turmys sapasyn arttyrýǵa baǵyttalyp otyr. Sondyqtan Memleket basshysynyń barlyq reformasyn sapaly zańdarmen ýaqtyly qamtamasyz etýimiz kerek. Osy rette senatorlar zań shyǵarýǵa bastamashyl bolý quqyǵyn keńirek paıdalanýǵa tıis», – dedi Máýlen Áshimbaev.

Bilim berýde, sot pen quqyq qorǵaý júıelerinde de sapalyq turǵyda ózgerister bolýy kerek. Sonymen qatar, Prezıdent Esep komıtetin qarjylandyrýdyń ózge tártibin aıqyndap, ony Parlamenttiń salalyq komıtetteri arqyly júzege asyrýǵa tapsyrma berdi. Senat Tóraǵasy Bıýro otyrysynda osy keshendi jospardyń bári zańnamalyq turǵyda qoldaýdy talap etetinin aıta kelip, depýtattyq korpýstyń aldynda aýqymdy jumys turǵanyn jetkizdi.

Otyrys barysynda Senattyń turaqty komıtetteriniń tóraǵalary depýtattardyń óńirlerge saparynyń qorytyndylary týraly habardar etti. Depýtattar indettiń taralýy men dári-dármekpen qamtamasyz etý jaǵdaıyna monıtorıng júrgizdi, pandemııamen kúresýge kómektesti, sondaı-aq Memleket basshysynyń tapsyrmalary aımaqtarda qalaı oryndalyp jatqanyn qadaǵalady.

Odan bólek, senatorlar elimizdiń barlyq oblystaryndaǵy ónerkásiptik, aýyl sharýashylyǵy jáne áleýmettik nysandardy aralap, eńbek ujymdarymen kezdesti. Jergilikti jerlerde azamattardy qabyldady.

Senat Tóraǵasy Máýlen Áshimbaev jańa sessııa ashylar aldynda Memleket basshysymen kezdeskenine nazar aýdardy. Sol kezde Qasym-Jomart Toqaev Senattyń róli ár zań jobasyn sapaly pysyqtaýdan turatynyn jáne zań shyǵarý isinde jalpyulttyq múddelerdi basshylyqqa alýy tıis ekenin erekshe atap ótken bolatyn.

Bıýro otyrysynda Májilisten kelip túsken zań jobalary Senat komıtetterine bólinip berildi.

Qarjy jáne bıýdjet komıtetine «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkasııalaý týraly» zań jobasy berildi.

Konstıtýsııalyq zańnama, sot júıesi jáne quqyq qorǵaý organdary komıteti «Qazaqstan Respýblıkasy men Birikken Arab Ámirlikteri arasyndaǵy sottalǵan adamdardy berý týraly shartty ratıfıkasııalaý týraly» zań jobasymen aınalysatyn boldy. Bas komıtetterge Senattyń basqa komıtetteriniń usynystaryn jınaqtaý jáne osy qujattar boıynsha qorytyndylar daıyndaý tapsyryldy.

Budan basqa Bıýro otyrysynda Senattyń 10 qyrkúıekte bolatyn aldaǵy jalpy otyrysynyń kún tártibi de belgilendi. Jańa sessııada qaralatyn alǵashqy qujat «Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasy bolady. Atalǵan zań jobasy Májiliste maquldanyp, Senatqa kelip tústi. Tabıǵı qoryqtar týraly kólemdi bul joba osy aptada birinshi oqylymda qaralady.

Sonymen qatar turaqty komıtetter Memleket basshysynyń Joldaýyn iske asyrý jónindegi Senattyń 2020 jylǵa arnalǵan negizgi is-sharalar josparyna usynystar berdi.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar