Kúzgi ańshylyq maýsymy 5 qyrkúıekte ashyldy. Osy mezetti asyǵa kútkender qazir jappaı ańǵa shyǵyp jatyr. Soltústik Qazaqstan oblystyq PD tabıǵat qorǵaý bólinisi de bul kezde kúsheıtilgen rejimde jumys isteýge kóshedi. О́ıtkeni, ańshylyqqa ruqsat berildi eken dep eshqandaı ruqsat qaǵazsyz kózdi jumyp myltyqty tarsyldata beretinder kóp. Ondaılardyń taǵy bir súıikti isi – ashyq tabıǵat aıasynda bótelkelerdi bosatý. Al ondaı kóńildi otyrystardyń aıaǵy qaýipti qylyqtarǵa ulasyp jatady. Onyń ústine báriniń de qoldarynda myltyq bolǵan soń jaǵdaı tipti kúrdelene túsedi.
Joǵary atalǵan LADA Granta avtomashınasy da dál osy kúni ustaldy. Mamlıýt aýdandyq polısııa bóliminiń ınspektory Rashıd Valıev pen aýdandyq ańshylyq qoǵamynyń egeri ekeýi kezekshilikte júrip ony toqtatqan. 33 jasar júrgizýshiniń myltyqtarǵa ıelik etý, tirkelý, sondaı-aq ańshylyqqa ruqsat qaǵazy bolmaǵan. Mashınadan myltyqtarmen birge 18 oq alynǵan. Qazir onyń ústinen úsh ákimshilik hattama toltyrylyp, isi sotqa jiberildi. Myltyqtar zańsyz bolǵandyqtan tárkilengen.
Tabıǵat qorǵaý polısııasyna ańshylyq maýsymy bastalǵan osy sátten damyl joq. 5 qyrkúıekten bastap jyl qustaryn atýǵa ruqsat berilse, odan ári qurlardy, bulandardy, qabandardy, elikterdi atýǵa da ruqsat beriledi. Al qarasha aıynan bastap túlki, qarsaq, qoıan aýlaýǵa da ruqsat. Ańǵa qumar jandar osy kezdi jibermeýge tyrysady. Biraq bári birdeı ańshy kýáligi, tólengen gosposhlınanyń túbirtegi, ań sharýashylyǵynan joldamasy qoldarynda bolýy kerektigin bile bermeıdi. Keıbireýi bilse de, sondaı qujattardy alyp júrýge moıyndary jar bermeıdi.
Jalpy tabıǵat qorǵaý salasyndaǵy qylmystardyń, buzýshylyqtardyń aldyn alý SQO PD únemi nazarynda. Jyl basynan beri "Brakoner", "Taza Qazaqstan" jedel-profılaktıkalyq sharalary júrgizilgen. Sońǵy segiz aıda osy sala boıynsha 655 quqyq buzýshylyq belgili boldy. Onyń ishinde 393 ań-qus, 245 balyq aýlaý jáne 11 ósimdik álemi boıynsha anyqtaldy. Osy buzýshylyqtar boıynsha jyl basynan beri 22 qylmystyq is qozǵaldy. Qazaq ejelden ań-qusty jappaı qyrýǵa, jerdi kúıdirýge, tipti ósip turǵan shópti japyrýǵa ruqsat bermeıtin halyq. Ata-babamyz aıalaǵan tabıǵatty búgingi urpaq ta kútý kerek ekendigi abzal boryshymyz.
