Tabıǵat saqshylary Torǵaı aýylynan 15 shaqyrym jerde beısaýat júrgen er adamdy baıqaǵan. Keıin onyń tún jamylyp qaban atyp, sol jerde oljasyn soıyp, buzyp jiliktegeni belgili boldy.
Kúdikti óziniń ańǵa shyqqanyn, jabaıy qabandardy atyp alǵanyn moıyndady. Odan ańshy pyshaǵy men 16 kalıbrli ańshy myltyǵy tárkilenip alyndy.
Polısııa departamenti baspasóz qyzmetiniń málimetinshe, atalǵan fakti boıynsha QR QK-niń 337-babynda kórsetilgen "zańsyz ań aýlaý" qylmysy boıynsha sotqa deıingi tergeý bastalǵan.
Jalpy, kúzgi ań aýlaý maýsymy bastalǵaly oblysta 36 ákimshilik quqyq buzýshylyq tirkelgen. Onyń ishinde ań aýlaý erejelerin buzǵany úshin 27, balyq aýlaý erejelerin buzǵany úshin 4, qarý alyp júrý jáne tasymaldaý erejelerin buzǵany úshin 4 adam jaýapkershilikke tartylǵan.
Qazir aımaqta zańsyz ańshylyqqa qarsy reıd sharalary ótip jatyr. PD-niń habarlaýynsha, sharanyń alǵashqy úsh kúni ishinde oblystaǵy ańshylyq alqaptary men sý aıdyndarynda 828 ańshy tekserilgen.
Qostanaı oblysy
