Álem • 10 Qyrkúıek, 2020

Grekııadaǵy eń iri bosqyndar lageri janyp ketti

23 ret kórsetildi

Grekııadaǵy eń iri bosqyndar lageri túgi qalmaı janyp ketti. Bul Lesbos aralyndaǵy Morıa bosqyndar lagerinde osy aptada oryn alǵan ekinshi órt. Seısenbiden sársenbige qaraǵan túni bolǵan alǵashqy oqıǵa saldarynan lager qatty zardap shekken edi, dep habarlaıdy Egemen.kz

Qazir qyzyl jalyn tolyǵymen aýyzdyqtaldy. Abyroı bolǵanda, bosqyndar arasynda zardap shekkender joq.  Biraq keıbir mıgranttar tútinnen ýlanǵan. Bastapqyda 3 myń adamǵa shaqtalǵan lagerde qazir shamamen 13 myń adam ómir súredi. Álemniń  70 elinen kelgen bosqyndar  arasynda aýǵandyqtar kóp eken.

Buǵan deıin alǵashqy órt tirkelgende Grekııa premer-mınıstri Kırıakos Mısotakıs  bolǵan oqıǵa úshin bosqyndardyń ózderin aıyptaǵan edi. Onyń aıtýynsha, olar 35 mıgrantta koronavırýs anyqtalǵannan keıin ákimshilik tarapyna agressııa kórsetip, karantınnen qashpaq bolǵan. Dese de bul áreketteri sátsiz aıaqtalypty. 

О́rtten keıin bosqyndarǵa lagerden ketýge ruqsat etildi, biraq polısııa kórshi eldimekenderge kirýine jol bermeı, aýyldarǵa aparatyn joldardy jaýyp tastaǵan. Alapat apattan myńdaǵan adam baspanasyz qaldy. Bılik olar úshin ýaqytsha turaq izdep jatyr.

Al ózge elder bul jaǵdaıǵa beı-jaı qarap otyrǵan joq. Máselen, Germanııanyń Syrtqy ister mınıstri Haıko Maas bul oqıǵany gýmanıtarlyq apat dep atady jáne bosqyndardy EO elderine taratýǵa daıyn ekendigi týraly da jazdy. 

Aıta keteıik, buǵan deıin de áleýmettik jelilerde bosqyndar men jergilikti turǵyndar arasyndaǵy jaǵdaı shıelenisip turǵandyǵy jóninde habar taraǵan. Osy joly da da aral turǵyndary tarapynan bosqyndarǵa narazylyq baıqalypty. Olar órt sóndirýshiler jetkende óz eldimekenderinen ári qaraı júretin joldy jaýyp tastap, bosqyndarǵa jetýge múmkindik bermegen.

BUU Bosqyndar isteri jónindegi Joǵarǵy komıssarynyń basqarmasy mıgranttar men jergilikti turǵyndar arasyndaǵy shıelenis týraly biletinin habarlady. "Biz barlyǵyn ustamdylyq tanytýǵa shaqyramyz jáne lagerdegi adamdardan artyq qozǵalystardan aýlaq bolýdy jáne ýaqytsha sheshim tabylǵansha sabyr saqtaýdy suraımyz", delingen habarlamada. 

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar