Onyń aıtýynsha, tirkelgen azamattar 2021 jyldyń 1 qańtarynan bastap medısınalyq kómekti ala bastaıdy. Bul rette medısınalyq uıym qormen keler jylǵa arnalǵan tegin medısınalyq kómektiń kepildik berilgen kólemi sheńberinde jáne MÁMS júıesinde alǵashqy medısınalyq-áleýmettik kómek qyzmetterin kórsetýge shart jasasýy tıis.
Emhanaǵa tirkelý elektrondyq úkimettiń www.e.gov.kz veb portaly arqyly elektrondyq sıfrlyq qoltańba bolǵan kezde ǵana júrgiziledi. Portalǵa tirkelgennen soń densaýlyq saqtaý bóliminde ornalasqan "Medısınalyq-sanıtarlyq alǵashqy kómek kórsetetin uıymǵa tirkelý" qyzmetin tańdaý qajet.
"Emhana pasıent týraly aqparatty memlekettik aqparattyq júıelerden avtomatty túrde alady. Operasııa sátti bolǵan jaǵdaıda azamatqa medısınalyq uıymnyń "Elektrondyq sıfrlyq qoltańba" qoıylǵan elektrondy qujat túrinde tirkeý týraly habarlama beriledi. Tirkelý úshin emhanalardyń tizimimen qordyń www.fms.kz saıtynda tanysýǵa bolady. Tirkelý naýqanynyń qorytyndysy boıynsha medısınalyq uıymdar bólinisinde halyqtyń tirkelgen sanyna baılanysty 2021 jylǵa qarjylandyrý josparlanady. Árbir tirkelgen turǵyn úshin medısınalyq uıymdarǵa aı saıyn jan basyna shaqqandaǵy qarjylandyrý tólenedi", dedi oblystyq mindetti áleýmettik medısınalyq saqtandyrý qorynyń basshysy Rýslan Bektýbaev.
Halyqtyń jekelegen sanattary tikeleı emhanaǵa tirkele alady. Ol úshin ótinish pen jeke basyn kýálandyratyn qujat qajet. Bul sanatqa zeınetkerler, múgedekter, zań boıynsha bala kezinen múgedekke taǵaıyndalǵan qamqorshylar, patronat tárbıeshiler, kolonııalarda jazasyn ótep jatqandar, stýdentter, merzimdi qyzmettegi áskerı qyzmetshiler, shet memlekette týylǵan balalar, senimhat boıynsha tirkeýdi resimdeıtin adamdar jatady.
Saqtandyrý mártebesine qaramastan, barlyq azamattar tegin medısınalyq kómektiń kepildik berilgen kólemin alýǵa quqyly. Josparly emdeýge jatqyzý, beıindi mamandardyń qabyldaýy, qymbat turatyn tekserýlerden ótý jáne joǵary tehnologııalyq em alý úshin MÁMS júıesinde saqtandyrylǵan bolýy qajet. Saqtandyrý mártebesin Elektrondyq úkimet portalynda, qor saıtynda jáne Telegram-daǵy SaqtandyryBot arqyly bilýge bolady.
Mańǵystaý oblysy
