Qostanaı qalasynda turatyn jalǵyzbasty ana Nadejda Dmıtrıevanyń úıelmeli-súıelmeli 8 balasy bar. Rýzana, Elvına, Veronıka, Aleksandra, Anastasııa, Lıýbov, Vıktorııa esimdi jeti qyzy úıdiń kenjesi Vıktordy qoldan túsirmeı, anasyna qolǵanat bolyp ósip keledi. «Qostanaı sý» kásiporny bıyl bul úıdegi 8 balaǵa qysqy kıim satyp alyp berýdi jón kóripti. Úr jańa qysqy kúrte, sándi kombınezon, bas kıim, jyly ári jep-jeńil etikterdi kıip kórgen shıetteı balalar shattyqqa kenelip qýanyp qaldy.
– Biz Dmıtrıevter otbasyn burynnan bilemiz. Jyl on eki aı ishinde aınalyp keletin ár maýsym qarsańynda mindetti túrde kómek kórsetýdi úrdiske aınaldyrdyq. Bıyl «Mektepke jol» aksııasy aıasynda jyly kıimder ákeldik. Kóp bala tárbıelep otyrǵan kásiporyn jumysshylarynyń otbasyn da nazardan tys qaldyryp kórgen emespiz. Olardy da múmkindiginshe bazarlyqpen qýantyp, tartý-taralǵy jasap turamyz, – dedi «Qostanaı Sý» MQK dırektorynyń marketıng jáne jalpy máseleler jónindegi orynbasary Arman Júnisov.
Dmıtrıevter otbasy bıyl memlekettik baǵdarlama boıynsha baspanaly bolypty.
– Jalǵyzbasty adamǵa shıetteı balany baǵyp-qaǵyp ósirý qıyn ǵoı. Degenmen kópshiliktiń, memlekettiń qamqorlyǵyn sezinip otyrmyn. Adamǵa kádimgideı jiger beredi. Qazir basymyzda baspana bar. Buǵan deıin qaladaǵy jeke úılerdiń birin jaldap turdyq. Áýeli jetimder sanatynda páter kezegine turdym. Keıin áleýmettik az qamtylǵandar tobynyń ókili retinde tirkeldim. Sońǵy ret kópbalaly ana retinde kezekke turyp, kóp keshikpeı páter alyp, baspana baqytyna keneldik. Úıimiz keń, bárimizge oryn jetedi. «Qostanaı Sý» kásiporny osymen úshinshi jyl kómek qolyn sozyp keledi. Bıyl mamyrda páterli bolǵanymyzdy estip, arnaıy kelip quttyqtap, tipti úı qujattaryn resimdeýge deıin kómektesti, – dedi jalǵyzbasty ana.
Atalǵan ujymnyń kópbalaly jáne tolyq emes otbasylarda tárbıelenip jatqan 40 balany óz qamqorlyǵyna alyp, turaqty qoldaý kórsetip otyrǵanyn aıta ketken jón.
Qostanaı oblysy
