Taıaýda ǵana 10 jasqa tolǵan Ekaterınanyń anasy Oksana Býzmakova Nur Otan partııasynyń qalalyq fılıalyna baryp, qarshadaı qyzynyń júrip-turýy muńǵa aınalǵanyn aıtyp, kómek suraǵan. Odan soń, kishkentaı Katıanyń ózi de partııa tóraǵasynyń birinshi orynbasarynyń keńesshisi Nazıl Razzaktyń onlaın qabyldaýynda bolyp, múgedekter arbasyn armandap júrgenin aıtqan.
Partııa ókili bul máseleniń sheshiletinin aıtyp, ýádesin bergen edi. Kóp uzamaı arba da tabyldy, arman da oryndaldy. Kúni keshe ǵana Nur Otan partııasynyń «Kedergisiz keleshek» jobasy aıasynda ótken qaıyrymdylyq shara barysynda bir top belsendi Ekaterınaǵa múgedekter arbasyn tartý etti.
– Qyzymnyń qýanyshynda shek joq. Dúnıede qozǵalyssyz otyrýdan jaman nárse joq eken. Kóktemnen beri ózdiginen úıden shyǵa almaı qalyp edi, endi aýlaǵa, taza aýaǵa shyǵyp serýendeı alatyn boldy, – dedi kózine qýanysh jasy úıirilgen Ekaterınanyń anasy.
Qostanaı oblysy
