Saıabaqqa ǵumyr boıy eli, jeri úshin eńbek etken Qudaıbergen Nurǵalıevtyń esimi berildi. Jol salasynda uzaq jyldar jumys istep, egemendi elimizdiń «Qurmetti jolshysy» atanǵan Q. Nurǵalıevtyń eren eńbegin qyzy Gúlnaz Qudaıbergenqyzy jalǵastyryp júr. Áke amanatyn arqalap júrgen qyz saıabaq salyp, aýyldastaryna syıǵa tartty, burynǵy Iýjnyı kóshesine kúrdeli jóndeý jumystaryn júrgizip berdi. Jol jıegine trotýar tósedi. Elim dep ketken er esimi erteńgi urpaq jadynda saqtalsyn degen nıette aýyl turǵyndary bir aýyzdan Iýjnyı kóshesine Qudaıbergen Nurǵalıevtyń atyn bergen.
Sanıtarlyq talaptar saqtala otyryp, saıabaq pen kósheniń ashylý saltanatyna aýdannyń basshylary, qurmetti azamattary, Qudaıbergen Nurǵalıevtyń áriptesteri keldi.
- Qudysh aǵamyz halqyn oılaǵan azamattardyń biri edi. Jazdaı jol jóndesek, qystaı qar tazalaıtynbyz. 2010 jyly qystyń boranynda joldaǵy qarmen alystyq. Sonda aǵamyz «joldardy halyq rıza bolatyndaı etip qashan jóndeımiz» dep mazasyzdanatyn. Buıyrsa Qudysh aǵamyzdyń armany oryndalyp keledi. Joldar jóndelip jatyr, - dedi Respýblıkalyq avtomobıl joldary komıtetiniń tóraǵasy Saıranbek Barmaqov.
О́mirin jol salasyna arnaǵan asqar taý áke úsh qyz tárbıelep ósirdi. Qyzdary áke atyna kir keltirmeı el alǵysyna bólengen. «Kókpekti joldary» JShS basshysy Gúlnaz Nurǵalıeva týǵan jerin abattandyrý úshin zor eńbek atqaryp júrgenin aýyldastary maqtanyshpen aıtady. Sondaı-aq, "Kókpekti Joldary" JShS aıasynda «Asfalt-beton qospalaryn óndirý» zaýytyn iske qosqan. Zaýytta asfalt-beton qospalarynyń ystyq jáne sýyq túrlerin shyǵarady. Qıyrshyq tasty usatý sehy da jumys istep tur. Názik jandylardyń mundaı ispen aınalysýlary sırek. Endi mine saıabaq saldy. Saıabaqtyń tórinde jer sharynyń belgisi tur. Qyzdary tuǵyrǵa ákesiniń músinin qoısa da bolar edi, biraq jer ortaq, saıabaq ortaq bolǵandyqtan jer sharynyń belgisin qoıypty.
