– Bul – Qazaqstannyń soltústik oblystaryndaǵy jalǵyz ferma. Qazir bekireni shetinen satyp ta jatyrmyz, – deıdi bekire ósirýshiler.
Shaǵyn sehtyń tuıyq sýmen qamtamasyz etý tehnologııasyn paıdalanýǵa múmkindik beretin derbes sý tazartqysh júıesi bar. Bekire basseınindegi sý aýystyrylmaıdy, tek arnaıy súzginiń kómegimen tazartylyp, oǵan ýltrasúzgi qosylyp otyrady. Balyq ósirýshilerdiń aıtýynsha, bekire sý sapasyna óte sezimtal balyq eken. Tabıǵı ortada birneshe aı ǵana damıtyn bul balyq mundaǵy basseınde jyl on eki aı boıy ósýin toqtatpaıdy. Bastysy, sý temperatýrasyn 20-22 gradýsta turaqty ustap, bekireni azyqtan taryltpaı, jaryq rejiminiń saqtalýyn qadaǵalap, qolaıly jaǵdaı jasap otyrý kerek.
– Biz aldymen Reseıdiń kóptegen bekire fermasyn aralap kórip, olardyń tehnologııalaryn zerttep aldyq. Odan keıin ǵımarat taýyp, qurylǵylardy ornattyq. Shetelden qymbat bekire shabaqtaryn ákelip, basseınge jiberdik. Úsh aıdan soń shabaqtar túgeldeı qyrylyp qaldy. О́te kúrdeli kezeńderdi bastan ótkerdik. Biraq úmit úzbedik. Bul kásipke, eń bastysy, tabandylyq kerek. Biz, minekı, daıyn ónimge qol jetkizip otyrmyz. Myna basseındegi bekireler shamamen bir tonna bolyp qalar, – dedi Valentın Ishenko.
Kásipkerler bekire azyǵyn Reseıdiń Belgorod qalasynan aldyrtady. Balyq uny, bıdaı, soıa burshaǵynyń untaǵy, ósimdik maıy sııaqty toǵyz qospadan turatyn bul qurama azyq pandemııadan keıin eki ese qymbattap ketken. Soǵan qaramastan balyq fermerleri Qostanaı aýdanynan 1 gektar jer alyp, óndiris kólemin ulǵaıtýdy kózdep otyr.
Qostanaı oblysy
