«Týr de Fransty» táýir qorytyndylady

Bas-aıaǵy 23 kúnge sozylǵan veloshabandozdar arasyndaǵy eń beldi jarystyń qorytyndysy boıynsha, jalpy esepte 22 jas­taǵy slovenııalyq Tadeı Po­gachar (UAE Team Emirates) top jardy. Sonymen qatar slo­venııalyq jas talant taýly kezeńniń úzdigi jáne «Týr de Frans» jarysynyń eń jas veloshabandozy ataǵyn qosa jeńip aldy. Osyndaı jetistiginiń arqasynda ol «Týr de Franstyń» biraz rekordyna túzetý engizdi.

Máselen, Tadeı Pogachar «Týr de Fransta» top jarǵan Slo­venııadan shyqqan tuńǵysh velosportshy atandy. Sonymen qatar ol týrnır tarıhynda jeńimpaz atanǵan eń jas veloshabandoz (21 jas, 11 aı jáne 29 kún) boldy.

Budan bólek Pogachar «Týr de Franstyń» keıingi 86 jyldaǵy taýly kezeńniń úzdigi atanǵan eń jas sportshy ataǵyn ıelendi. Já­ne de velojarys tarıhynda al­ǵash qatysqan jyly jeńis tuǵy­ryna kóterilgen 12-shi sportshy.

21 jastaǵy slovenııalyq veloshabandoz 9 kezeń boıy jalpy esepte úzdik úshtikten túsken joq. Al 20-kezeńge deıin ekinshi orynda kelgen Pogachar sońǵy kezeńde sary jeıdeniń ıegeri atandy. Pogachar – «Týr de Frans» tarıhynda jekeleı jarys kezeńinen keıin sary jeıde kıgen besinshi veloshabandoz.

Velosportshylardyń beıres­mı álem chempıonaty sanalatyn «Týr de Frans» jarysyna qazaqstandyq «Astana» ve­lokomandasy da qatysyp, táýir nátıje kórsetti dep se­nim­men aıta alamyz. Sebebi el chempıo­ny Alekseı Lýsenko men komanda kapıtany Mıgel Anhel Lopes tıisinshe 6-shy jáne 17-kezeńderde top jardy. Al jarys qorytyndysy boıynsha ko­lýmbııalyq veloshabandoz jalpy esepte altynshy oryn­nan kórindi. Sáıkesinshe, «As­tana» ókilderi arasyndaǵy eń úzdik nátıje de Lopeske tıesili. Jalpykomandalyq esepte bizdiń komanda 22 ujymnyń arasynda jetinshi oryndy ıelendi.

– «Týr de Frans» jarysy­na tuń­ǵysh ret qatyssam da men úshin joǵary deńgeıde ótti. Osyn­daı iri jarysta baq synap, Pa­rıjge deıin jetkenimniń ózi úlken jeńis. Maǵan bul jarys óte una­­dy, joǵary deńgeıde óner kór­setip, ár kezeń saıyn eń myqty qar­sylastardyń qasynda boldym. Sonymen qatar taýly kezeńniń jeńimpazy atandym. Sońǵy jarys jolyna deıin úzdikter qata­ryn­da kelip, júldege qol sozym sátte maǵan ýaqyt jetpeı qaldy. Alaıda men ózime qundy tájirıbe jınadym jáne kelesi jyly budan da kúshti bolyp oralatynyma senimdimin. Osy úsh apta ishinde barlyq komanda ókilderine, sha­bandozdarǵa, qyzmetkerlerge, menedjmentke alǵys aıtqym keledi!», dedi Mıgel Anhel Lopes.

Al qazaqstandyq velokoman­danyń bas menedjeri, elimizdiń dańqty veloshabandozy Alek­sandr Vınokýrov «Astana» komanda retinde jaqsy nátıje kórsetip, «Týr de Fransty» ta­bysty ótkizdi dep sanaıdy. «Qa­zaqstan chempıony Alekseı Lý­senko men bizdiń kóshbasshymyz Mıgel Anhel Lopes óte tartys­ty bolǵan eki kezeńde jeńiske jetti. Biz jaqsy komandalyq ju­­mys úlgisin kórsetip, úsh apta bo­ıy bir maqsat úshin komanda bo­lyp kóp jumys istedik. Biz birge jeńip, birge jeńildik, biraq bul bizdiń sporttyń bir bó­ligi ekenin umytpaýymyz qajet. Dese de komanda kórsetken nátı­jege kóńilimiz ábden tolady. Jal­py esepte altynshy oryndy olja­ladyq, eki taýly kezeńde úzdik atan­dyq jáne Mıgel Anhel Lopes pen Harold Tehadanyń sátti debıýtiniń kýágeri boldyq. Maý­sym áli jalǵasady jáne bizdi alda jańa jarystar men jańa beles­ter kútip tur», dedi jarys­ty qorytyndylaǵan Aleksandr Vınokýrov.