Atalǵan qordyń aımaqtyq fılıaly bıyl jyl basynan beri bıznesti jeńildikpen nesıeleý memlekettik baǵdarlamasyn iske asyrý sheńberinde Batys Qazaqstan oblysyndaǵy kásiporyndardyń 100 jobasyna jalpy somasy 9,6 mlrd teńgege paıyzdyq mólsherlemeni sýbsıdııalaý túrinde qarjylyq qoldaý kórsetken eken. Al jalpy somasy 1,3 mlrd teńge bolatyn 117 joba qordyń kepildiligin ıelenipti.
"Damý" qorynyń qoldaýyna ıe bolǵan kompanııalar qatarynda "Oral transformator zaýyty" JShS, "Shańyraq" túzetý-ońaltý ortalyǵy jáne "Talap" aksıonerliń qoǵamynyń medısınalyq ortalyǵy jelisi bar.
"Alageum Electric" holdıngtik kompanııasynyń quramyna kiretin "Oral transformator zaýyty" 6-10kV kerneýli kúshtik transformatorlardy óndiredi. Búgingi tańda zaýyt ónimi TMD memleketteri aýmaǵynda energetıka salasynda keńinen qoldanylady.
Zaýyttyń satý bóliminiń menedjeri Nurbergen Kárimovtiń aıtýynsha, "Damý" qorynyń sýbsıdııalaýy sheńberinde kásiporyn "Bıznestiń jol kartasy" memlekettik baǵdarlamasynyń aıasynda birneshe márte jeńildikpen nesıe alǵan. Sóıtip, jańa jabdyqtar satyp alynyp, aınalymdyq qarajat tolyqtyrylǵan.
- Jyl basynda eksporttyq áleýetti arttyrý maqsatynda «Basym jobalardy nesıeleý mehanızmi» baǵdarlamasynyń sheńberinde ekinshi deńgeıli bankten 15% jyldyq mólsherlememen 1,9 mlrd teńge somasyna nesıe aldyq. Bul nesıeniń 9%-yn «Damý» qory sýbsıdııalaıdy. Sonda biz nesıeniń tek 6 paıyzyn ǵana tóleımiz. Bul úlken kómek, - deıdi Nurbergen Kárimov.
"Qarapaıym zattar ekonomıkasy" baǵdarlamasy sheńberinde "Damý" qory "Talap" aksıonerliń qoǵamynyń medısınalyq ortalyqtar jelisine de qoldaý kórsetken. Bul kompanııa Oral qalasyndaǵy jetekshi jekemenshik klınıkalardyń biri. 26 jyl boıy medısınalyq qyzmet kórsetýmen aınalysatyn kompanııa keshegi koronavırýs indeti ýshyqqan kezde memlekettik qoldaýdyń arqasynda germanııalyq magnıttik-rezonanstyq tomografııa apparatyn ornatty. Qaýipti vırýsty der kezinde anyqtaýǵa bul quraldyń kómegi úlken.
- Jyl basynda medısınalyq jabdyq satyp alý maqsatynda biz Qazaqstan Halyq Bankine júgindik. "Qarapaıym zattar ekonomıkasy" baǵdarlamasynyń sheńberinde bank bizge 13% jyldyq mólsherleme boıynsha 250 mln teńge somasyna nesıe berdi. Onyń 7%-yn "Damý" qory sýbsıdııalaıdy, deıdi "Talap" aksıonerlik qoǵamy qalalyq kópbeıindi aýrýhanasynyń bas dárigeri Elena Dzıýba.
"Damýdyń" demeýshiligin kórgen taǵy bir mekeme - múmkindigi shekteýli balalarǵa arnalǵan «Shańyraq» túzetý-ońaltý ortalyǵy eken. Oral qalasynda bıyl jyl basynda ashylǵan ortalyqta múmkindigi shekteýli balalarǵa medısınalyq kómek kórsetip, túzetý jáne bilim berý fýnksııalaryn da biriktirip otyr. Ortalyqta túrli salanyń mamandary: nevrolog, reabılıtolog, neıropsıholog, defektolog, logoped, EDSh ınstrýktory, massajıst pen korreksııalyq pedagog jumys isteıdi.
- Jyl basynda jabdyq satyp alý úshin nesıe alýǵa "Damý" qoryna júgindim. Sóıtip "Sberbank" arqyly "Eńbek" 2017-2021 jyldarǵa arnalǵan nátıjeli jumyspen qamtý jáne jappaı kásipkerlikti damytý baǵdarlamasy aıasynda 6% jyldyq mólsherlememen 16,4 mln teńge alyp otyrmyn. "Damý" qory nesıe kepildiginiń 60 paıyzyn óz moınyna aldy, deıdi ortalyq dırektory Gúlnur Tólegen.
Batys Qazaqstan oblysy
