Birinshi bolyp sóz alǵan BUU Damý baǵdarlamasy turaqty damý jáne ýrbanızasııa baǵdarlamasynyń úılestirýshisi Fırýz Ibragımov ekologııalyq ortalyqtar qurylatynyn aıtty.
«Biz memlekettik deńgeıde engiziletin ekologııalyq tárbıe baǵdarlamalaryn engizý boıynsha halyqaralyq tájirıbeni, atap aıtqanda, AQSh, Eýroodaq elderi, Germanııadaǵy jaǵdaıdy zerdeledik. Tabıǵatqa uqypty qaraý mádenıeti Qazaqstanmen kórshi elderdiń ózinde jolǵa qoıylǵan. О́zbekstan, Tájikstan, Túrkimenstanda 2000 jyldardyń basynda qabyldanǵan arnaıy baǵdarlamalar bar. Ekologııalyq tárbıe turǵysynan bir deńgeıde bolý úshin mektep jasyna deıingi balalardan bastap eresek urpaqqa deıin jobany ázirleımiz. BUU DB aıasynda sońǵy 5 jylda 42 Nazarbaev zııatkerlik mektebinde «Klımattyq qobdıshalar» engizildi. Joba basqa oqý oshaqtarynda da qoldanylyp, óz nátıjesin berip keledi. Biz balalardy tabıǵatqa uqypty qaraýǵa, jer resýrstaryn, sý, orman jáne jaıylym jerlerin turaqty paıdalanýǵa, bilim men ǵylymdy úırenýge mektep qabyrǵasynan bastap baýlımyz», dedi F.Ibragımov.
«Serpin» Ulttyq bilim jáne ınnovasııa palatasynyń tóraǵasy Murat Ábenovtiń oıynsha, júıeli berilgen ekologııalyq tárbıe men bilim óndiriske paıdasyn tıgizedi. Sondyqtan óndiristik oryndar da óz kezeginde óskeleń urpaqqa ekologııalyq bilim berýge múddeli bolýy kerek.
«Ulttyq tabıǵı parkter iri kompanııalarǵa berildi. Mysaly, Ile Alataýynda qonaqtardy qabyldaıtyn ortalyqtar bar. Onda balalardy jergilikti tabıǵat erekshelikterimen tanystyrady. Iаǵnı balalar demala júrip bilim alady. EKSPO kezinde qoqysty qaıta óńdeý, odan energııa alý sııaqty halyqaralyq deńgeıdegi keremet tehnologııalar tájirıbege engizildi. Elimizdegi bir uıym balalardy tyń tehnologııamen qoqysty suryptap, ony durys paıdalanýdy úıretedi. Kompanııa ony qaıta óńdeý arqyly paıda kóredi. Jalpy, balalardyń ekologııalyq bilimin qalyptastyrý úshin barlyǵymyz birigip áreket etýge tıispiz. Ár salanyń óz baǵyty bar. Sondyqtan bul mindetti tek Bilim jáne ǵylym mınıstrligine artyp qoıýǵa bolmaıdy», dep atap ótti M.Ábenov.
Qazaqstan NUR ALEM pavılonynyń jetekshisi Ásem Omar tárbıeniń alǵashqy nári balanyń boıyna aldymen otbasynda sińiriletinine toqtaldy.
«Ekologııalyq bilimdi qalyptastyrý – ár otbasynyń mindeti. Balanyń boıyndaǵy týǵan jerine, tabıǵatqa, qorshaǵan ortasyna degen qamqorlyq sezimin, janashyrlyq qabiletin áke sheshesi, ata-ájesi oıatý kerek. Ata-babamyzdyń ulan-baıtaq jerine nemquraıdy qaramaý – árqaısymyzdyń azamattyq boryshymyz. Tastaǵan qoqys erteń ózimizge aýrý bolyp jabysatynyn túsinýge tıispiz. Aýanyń, aınalamyzdyń, sýdyń taza bolýy bárinen buryn ózimizge kerek, óıtkeni sol aýany ózimiz jutamyz, sýdy ishemiz, aınalada júremiz. Bastysy, osyny balalarǵa túsindirýimiz qajet», deıdi Á.Omar.
