QARAQShYLARDYŃ ÁREKETI ISKE ASPADY

Almaty qalalyq  IID uıymdas­qan qylmyspen kúres basqarmasy men “Arlan” arnaýly bólimshesiniń qyzmetkerleri úshin naýryz aıy­nyń sońǵy kúniniń qıyndyǵymen qosa, jetistigi men qýanyshy da mol boldy. “Qazkommersbanktiń” qaýip­­­sizdik qyzmeti ókilderiniń habaryn alǵan boıda, shuǵyl túrde bankke jetken olar jeke kásipker men onyń ápkesin bes jastaǵy qyzy­men birge qaraqshylar qoly­nan qutqaryp aldy. Bul oqıǵadan buryn da aýyr qylmystarǵa baryp, jaýapqa tartylǵan qaraqshylardy quryqtaý, aıtýǵa ońaı bolǵanymen, is júzinde, árıne, ońaı soqpaǵany sózsiz. “Qyl­myskerler qaıtkende de óz­­deri kózdegen aram oıly maqsatyna jetpek bolyp, barynsha qarsylyq kórsetti”, deıdi uıymdasqan qyl­mys­pen kúres basqarmasynyń bas­tyǵy, polkovnık Kozlov. Oqı­ǵanyń qaýipti jaǵdaıǵa ulasýyna taǵy da ańǵaldyq sebep bolǵan tárizdi. Elektr qurylǵylaryn jón­deýmen aınalysatyn jeke kásipker men onyń jıyrma bes jastaǵy ápkesi qaraqshylar qolyna baı­qaýsyzda túsken. О́zderin “klıent­piz” dep tanystyrǵan qaraqshylar mamandardy aldyn-ala jalǵa alǵan úıge aldap shaqyrǵan. Páterge alǵash kirgen Romandy olar birden soqqyǵa jyǵyp, syrtta jeńil máshınede ony kútip otyrǵan apasy men onyń bes jastaǵy qyzyn úıge shaqyrýǵa buıyrady. Jas áıel men onyń qyzyn qozǵalmaıtyndaı etip baılap tastaǵan buzaqylar, kásip­ker jigitke ózderimen birge bankke baryp, onyń óz esep-shotynan 17 mıllıon teńge alýyn buıyrady. Birshama ýaqyttan beri olardy syrttaı baqylap júrgen qaraq­shy­lar, olardyń ákeleriniń úıin satyp, aýqymdy qarajatty ıelen­gen­diginen habardar bolatyn. Sýyq qarý men jáne áldebir suıyq tol­tyrylǵan shprısteri bar qylmys­kerler kásipker jigitti “eger aıtqanymyzdy oryndamasań, onda ápkeńe jáne onyń kishkene qyzyna ıneksııa arqyly SPID-qaterli dertin juqtyramyz” dep úreıin alyp, qorqytqan. Baýyrlarynyń ómiri úshin qatty alańdaǵan jigittiń olardyń buıryǵyna kónbeske amaly da qalmaǵandyǵy belgili. Bir quptarlyǵy, Roman bankke kelgen­nen keıin ózin jáne baýyrlaryn qylmyskerler qolynan qutqarý­dyń eń utymdy amalyn tapqandaı bolady. Esep-shottan aqsha alýǵa arnal­ǵan qaǵazdy toltyryp turyp, onyń astyna qaraqshylarǵa baıqat­paı “men qaraqshylardyń nysana­syn­da turmyn, týystaryma da úlken qater tónip tur” dep jazyp beredi. “Bul oraıda, árıne “Qaz­kom­mersbank­tiń” opera­sııalyq bólimi qyz­met­ker­leriniń jáne bólim basty­ǵynyń, banktiń qaýipsizdik qyzmeti ókilderi­niń kásibı sheber­ligin, óz isterine degen joǵary jaýap­kershi­ligin atap ótý qajet” – deıdi Almaty qalalyq IID baspasóz qyzmetiniń jetekshisi Saltanat Ázirbek. Sóıtip, Uıymdasqan qylmys­pen kúres basqarmasy men “Arlan” arnaýly bólimshesi ókilderiniń shuǵyl da batyl qımyly nátıje­sinde qylmyskerdiń biri páterde, ózgeleri banktiń ishinde qolǵa tústi. Baqyt BALǴARINA, Almaty.