«Astana Opera» balet maýsymynyń ashylýy kórermen qaýymdy ǵana emes, sonymen qatar qazaqstandyq jetekshi buqaralaq aqparat quraldary ókilderiniń de zor qyzyǵýshylyǵyn týdyrdy. Is-sharanyń bastalýyna deıin jýrnalıster Altynaı Asylmuratovaǵa óz suraqtaryn jaýdyrtty. Álbette, «Karantın kezinde trýppa qalaısha jaqsy jumys qalpyn saqtaı aldy?» degen saýal basty nazarda boldy. Balet trýppasy kórkemdik jetekshisiniń sózinshe, bul ońaı sharýa emes, karantın talaptaryn jeńildetken soń ǵana barlyq sanıtarlyq normalarǵa sáıkes ártister zalda bar kúshimen daıyndyqtaryn bastaı aldy.
– Keremet sahnamyz ben kórermen qaýymdy qalaısha saǵynǵanymyzdy sózben aıtyp jetkizý qıyn. Balet maýsymynyń ashylýy barshamyz úshin úlken qýanysh. Maýsym jarqyn ári mazmundy, mándi, eń bastysy jemisti bolsyn, – dep tilegin bildirdi Altynaı Asylmuratova.
Shymyldyq túrildi, shattanǵan kórermen tyna qaldy. Aldymen barlyǵy sahna jabdyqtaryna – ataqty ıtalııalyq ssenograf Esıo Frıdjerıonyń dekorasııalaryna tamsandy. Sodan keıin kórermender aýdıtorııasynyń nazary álemdik horeografııa jaýharlaryn, atap aıtqanda, P.Chaıkovskııdiń «Aqqý kóli», R.Petıdiń horeografııasyndaǵy «Parıj Qudaı anasynyń sobory», M.Petıpanyń horeografııasyndaǵy A.Adannyń «Korsar» jáne t.b. baletterden úzindilerdi usynǵan balet trýppasynyń ártisterine aýdy. K.Zverevanyń horeografııasyndaǵy «Zaman tynysy» baletinen dýet pen A.Sadyqovanyń horeografııasyndaǵy Steppe Sons «Qorqyt» qoıylymy keshtiń kórkin odan saıyn qyzdyra tústi.
Bul keshte Áıgerim Beketaeva, Baqtııar Adamjan, Ánel Rústemova, Gaýhar Ýsına, Oljas Tarlanov, Arman Orazov, Erkin Rahmatýllaev, Aqarys Beıbarys, Serik Naqyspekov, Shuǵyla Ádephan, Sultanbek Ǵumar, Erkejan Júnisova, Daler Zaparov, Ásel Sháıkenova bastaǵan talantty ártister ansambli jurtshylyqqa óz ónerin pash etti.
Kelesi kúni «Astana Opera» Úlken zalynyń sahnasynda N.A.Rımskıı-Korsakovtyń mýzykasyna M.Fokınniń «Sheherazada» bir bólimdi baleti usynyldy.
«Sheherazada» spektakli HH ǵasyrdyń basynda – balet óneriniń qarqyndy damý kezeńinde qoıylǵany belgili. «Astana Opera» sahnasyna bir bólimdi tolyqqandy baletti Reseıdiń Halyq ártisi Andrıs Lıepa alyp shyqty. Baletke Shahrııar patsha men onyń inisi týraly «Myń bir tún» ertegisiniń jelisi negiz bolǵan.
Saltanatty shyǵys naqyshtary men qushtarlyqqa toly mahabbat oqıǵasy zaldaǵy birde-bir kórermendi beıjaı qaldyrǵan joq. Lev Baksttyń qalpyna keltirilgen dekorasııalary men kostıýmderine kórermen qaýym tańdaı qaqty. Altyn quldyń partııasyn «Astana Opera» teatrynyń jetekshi solısi Baqtııar Adamjan, shyǵys sulýy Zobeıdanyń beınesin teatr solısi Anastasııa Zaklınskaıa usyndy. Olar partııalaryn jaı oryndap qana qoımaı, sahna tórinde óz keıipkerleriniń ómirin bastan keshirdi. Solısterdiń daryny arqasynda sahna naǵyz tańǵajaıyp ertegige aınaldy.
Shahrıardyń partııasyndaǵy Jánibek Imanqulov, Shahezman – Ildar Shakırzıanov, bas belsiz rólindegi Oljas Mahanbetálıev, sonymen qatar balet trýppasynyń barlyq ártisteri talǵamy bıik kórermenniń júregin jaýlap aldy.
– Baletten keremet áserge bólendim. Ártisterdiń ter tógip eńbek etkeni kórinip tur. Bul, eń aldymen, trýppanyń premeri Baqtııar Adamjan men Anastasııa Zaklınskaıaǵa qatysty. Ártister ertegini sahna tórinde shyndyqqa aınaldyra bildi, – dep pikirimen bólisti teatrdyń turaqty kórermeni Danııar Ospanov.
