– Mańǵystaý oblysynyń búginge deıingi qaıǵyly statıstıkasyn negizge alsaq, indetke qarsy kúreste 400-den astam medısına qyzmetkeri koronavırýs ınfeksııasy men pnevmonııany juqtyrǵan. Al qaıtys bolǵan medısına qyzmetkerleriniń sany – 8. Qaýipsiz eńbek jaǵdaıy jáne qıyn jaǵdaıǵa tap bolǵandarǵa kómek kórsetý máseleleri bizdiń kásipodaqtyń árqashan basty nazarynda boldy. Biraq búginde bul jaıt erekshe ózekti. Kásipodaq úshin óz densaýlyǵyna qaýip tónip tursa da, basqalarǵa kómektesetin medısına qyzmetkerlerin qoldaýdyń mańyzy arta tústi, – deıdi Mańǵystaý oblystyq densaýlyq saqtaý basqarmasynyń baspasóz hatshysy Nurbol Oqýov.
Onyń aıtýynsha, jumys ornynda Covid-19 juqtyrǵan medısına qyzmetkerlerine ótemaqy tóleý júıesin retteıtin quqyqtyq mehanızm belgili bir normalar men sanattardy belgileıdi. Oǵan barlyq medısına qyzmetkeri kire bermeıdi. Osyǵan baılanysty «SENIM» densaýlyq saqtaý júıesi jumyskerleriniń salalyq kásiptik odaǵy» RQB tóraǵasynyń basshylyǵymen kásibı boryshyn atqarý kezinde qaza tapqan medısına qyzmetkerleriniń otbasylaryna materıaldyq kómek kórsetý týraly sheshim qabyldandy.
Qazirgi tańda «SENIM» kásipodaǵynyń Mańǵystaý oblystyq fılıaly indet kezinde qaza tapqan 3 medısına qyzmetkeriniń otbasyna 1 mln teńgeden qarjylaı kómek kórsetti. Olardyń arasynda Munaıly aýdandyq ortalyq aýrýhanasynyń qaıtys bolǵan dárigeri men medbıkesiniń otbasy, sondaı-aq Jańaózen qalasynyń №2 emhanasy dárigeriniń otbasy bar.
– Jalpy, indet sebebinen qaıtys bolǵan medısına qyzmetkerleriniń otbasyna 3 mln teńge kóleminde qarjylaı kómek kórsetildi. Biz aldaǵy ýaqytta basqa da zardap shekken dárigerlerge qarjylaı ǵana emes, moraldyq kómek kórsetetin bolamyz, – deıdi olar.
Mańǵystaý oblysy
