О́rt sóndirýge №3-shi órtsóndirý bóliminiń bólimshesi men qalanyń №1-shi arnaýly órtsóndirý bóliminen 8 dana tehnıka men 26 adam qatysty. Kásibı sheberlikteriniń arqasynda órtsóndirýshiler tilsiz jaýdy 12 mınótte quryqtap úlgerdi. Osy az ǵana ýaqyttyń ishinde bıik úıden 78 adam evakýasııalandy, onyń 18 jas balalar. О́rttiń ishinde tikeleı qalǵan eki adam qutqaryldy. Sonyń ishinde 1973 jyly týǵan 2-shi toptaǵy múgedek ózdiginen júre almaıtyn bolǵandyqtan órtsóndirýshiler ony zembilmen alyp shyqty. Biraq jigittiń jaǵdaıy aýyr, onyń denesiniń 75 paıyzyn órt shalǵan. Qazir ol aýrýhanada aýyr halde jatyr.
Al órttiń kezinde óshirilgen jaryqtyń kesirinen lıfte tutqyndalyp qalǵan azamat kireberistegi tútinge tunshyǵyp, álsirep qalǵan eken. О́rtsóndirýshiler ony 7-shi jáne 8-shi qabattardyń arasynda toqtap qalǵan lıften esigin buzyp, zorǵa alyp shyqty. Alǵashqy kómek kórsetilgennen keıin jigit esin jınap, aýrýhanaǵa barýdan ózi bas tartty. «Tútin kireberiske tolyp ketkendikten onyń jaǵdaıy aýyr halge jetken. Sondyqtan órtsóndirýshiler lıftiń esigin súımenmen buzýǵa májbúr boldy. Esik ashylǵan boıda bizdiń jigitter onyń basyna aýa beretin qutqarýshy kapıýshon kıgizip, esin jınatty. Sonymen birge psıhologııalyq kómek te jasaldy. О́z ózine kelgen soń azamat óz aıaǵymen júrip, aýrýhanaǵa barǵysy kelmedi», dedi birinshi órt sóndirý bólimi bastyǵynyń orynbasary, osy órtti sóndirýge baǵynyshtylaryn jumyldyrǵan azamattyq qorǵanys maıory Marat Nurǵalıev.
Sonymen birge ol órtsóndirý mashınasynyń úıge jaqyn kelýinde qıynshylyq bolǵanyn jetkizdi. О́ıtkeni, úıdiń mańyndaǵy aýlada jekemenshik jeńil mashınalar tolyp turǵan. «Sol sebepti avtosatyny da qoıýǵa múmkinshilik bolmady», dedi ol.
Kireberistiń ishi tútinge tolyp ketken jaǵdaıda jumys istegen órtsóndirýshiler ózderin naǵyz kásibı mamandar retinde kórsetti. Basqa adam bul kireberiske bas ta suǵa almas edi. О́rtsóndirýshiler kelgen boıynda aımaqty jippen qorshap, ózge adamdardyń zardap shegýine bolmaıtyndaı etti. Bul ýaqytta basqa qyzmetkerler órt shyqqan úıde qalǵan adamdardy shyǵarýmen aınalysty. Al órttiń negizgi oshaǵyn sóndirýge qalǵan órtsóndirýshiler jumyldyryldy. Osyndaı yńǵaısyz jaǵdaıdaǵy úlken órttiń 12 mınótte sóndirilgendiginiń ózi – naǵyz kásibı sheberlikti kórsetip tur.
Qazir órttiń shyǵý sebepteri anyqtalýda. Aldyn ala jasalǵan boljamǵa qaraǵanda ol múgedek adamnyń tósekte temeki tartqandyǵynan bolýy múmkin.
PETROPAVL
