Bilim ordasynyń qurylysy 2019 jyldyń sáýir aıynda bastalǵan bolatyn. Mekteptiń boı kóterýine respýblıkalyq bıýdjetten 700 mln teńge qarjy bólindi. Jańa bilim ordasy tolyǵymen zamanaýı jabdyqtarmen jabdyqtalyp, kompıýterlik qurylǵylarmen qamtamasyz etildi. Odan bólek, jeke kompıýter synyby, qyzdar men ul balalarǵa sheberhana jáne zerthana kabınetteri jasaqtaldy.
«Búgin kópten kútken mekteptiń ashylýy bolyp jatyr. Aýylymyzda jańa mektep boı kóterdi. Oqýshylar men ata-analardyń qýanyshynda shek joq. Burynǵy mekteptiń jaǵdaıy nashar bolǵan. Endi muǵalimder jańa kompıýterlik synypta, ınteraktıvti taqtamen sabaq beretin bolady», deıdi Kóksý aýyldyq okrýginiń ákimi Álııa Bahtııarova.
Jańa mektep 38 adamdy jańa jumys ornymen qamtıdy. Onyń 29-y – ustazdar qaýymy. Muǵalimder tól merekeleri qarsańynda munyń úlken syı bolǵanyna qýanýda.
Aıta ketelik, budan bólek Kerbulaq aýdanynda «Jumyspen qamtý jol kartasy-2020» baǵdarlamasy aıasynda Sarybastaý orta mektebi jáne «Aýyl – el besigi» baǵdarlamasy aıasynda Sarybulaq orta mektebi kúrdeli jóndeýden ótýde.
Almaty oblysy
