Ol óz sózinde Aqmola oblysyndaǵy Rodına aýyly kezdesý orny retinde kezdeısoq tańdalmaǵanyn atap ótti. E.Turǵymbaev Memleket basshysy Qazaqstan halqyna arnaǵan Joldaýynda jergilikti polısııa qyzmetine “jurtqa jaqyn polısııa” qaǵıdasy boıynsha tutastaı reforma júrgizýge basa nazar aýdarǵanyna toqtaldy.
Osy reformany iske asyrýda quqyq buzýshlyqtyń aldyn alýdaǵy negizgi býyn sanalatyn ýchaskelik ınspektorlardyń qyzmetin jetildirýge basa mán beriledi. Mınıstr kezdesý barysynda jergilikti atqarýshy organdardyń basshylaryna jáne belgili kásipkerge quqyqtyq tártip pen azamattardyń qaýipsizdigin qamtamasyz etýge qosqan úlesi úshin alǵys bildirdi. Olardyń qoldaýy men kómeginiń arqasynda okrýg aýmaǵynda jyl basynan beri birde-bir qylmys tirkelmegen.
“Sizderdiń arqalaryńyzda ýchaskelik ınspektordyń jumys jasaýyna barlyq jaǵdaı jasaldy. Qyzmettik turǵyn úımen qamtylyp, qazir ol otbasymen turyp jatyr. Arnaıy qyzmettik avtokólikpen qamtyldy. Eń bastysy – ýchaskelik polısııa pýnktine arnaıy ǵımarat bólinip, oǵan aýyl boıynsha ornatylǵan 145 beınekamera ortalyqtandyryldy”, – dedi vedomstvo basshysy.
Mınıstr bul saparynda №33 balalar men jasóspirimder sport mektebiniń basshylyǵy jáne muǵalimderimen, sondaı-aq ýchaskelik ınspektorǵa aýylda quqyqtyq tártipti qamtamasyz etýge kómektesip júrgen eriktilermen kezdesti.
Ol eriktilerge qoǵamdyq tártipti saqtaýǵa belsendi qatysyp, ishki ister organdaryna kórsetken qoldaýy úshin rızashylyǵyn jetkizdi. Quqyq buzýshylyqtyń aldyn alý máselesi boıynsha mekteptiń qoǵamdyq ómirine belsendi aralasqandary úshin birqatar oqýshylar IIM Alǵys hattarmen marapattaldy.
Belsendi azamattyq pozısııasy jáne ishki ister organdaryna kórsetken kómegi úshin Mınıstr “Rodına” Agrofırmasy” JShS-nyń dırektory Ivan Saýerdi vedomstvalyq «Quqyq tártibin qamtamasyz etýge qosqan úlesi úshin» medalimen marapattady. “Sizderdiń osyndaı oń tájirıbelerińizdi biz árbir ákimniń nazaryna jetkizip, solardyń kómegimen búkil elimizge engizetin bolamyz”, – dedi Erlan Turǵymbaev.
