«Memleket basshysy osy máselege basa mán berip otyr. Prezıdentimiz naqty tapsyrmalar da berdi. Sondyqtan aldaǵy ýaqytta memlekettik organdar tarapynan áleýmettik kásipkerlikke júıeli qoldaý kórsetilý kerek. Bul rette erekshe qajettiligi bar adamdar men áleýmettik osal toptardyń kásipkerlikpen aınalysýyna jáne jumysqa ornalasýyna múmkindikti arttyrýǵa erekshe kóńil bólý qajet. Osy baǵyttaǵy negizgi qadamdardyń biri – áleýmettik kásipkerliktiń qyzmetin retteıtin jáne memleket tarapynan qoldaý kórsetýdiń tıimdi tetikterin anyqtaıtyn zań qabyldaý», – dedi Senat Tóraǵasy.
Sonymen qatar Máýlen Áshimbaev qazirgi tańda áleýmettik kásipkerlik kóptegen elde keń taraǵanyn tilge tıek etti. AQSh, Ulybrıtanııa, Kanada, Germanııa sııaqty elderde jalpy ishki ónimniń 3-ten 5 paıyzǵa deıingi kólemin áleýmettik kásipkerlik qamtamasyz etedi.
«Bul zań jobasyn bárimiz birlesip daıyndaýymyz kerek. Búgingi otyrysty osy baǵyttaǵy aýqymdy jumystyń basy dep qabyldaımyz. Jalpy áleýmettik kásipkerliktiń negizgi mindetteriniń biri – erekshe qajettiligi bar adamdardy ortaǵa beıimdeý jáne olardyń áleýmettik, ekonomıkalyq belsendiligin arttyrý. Qazirgi tańda elimizde áleýmettik baǵyttaǵy jobalardy sátti iske asyryp júrgen kásipkerler de bar. Zań jobasyn daıyndaý kezinde olardyń pikiri men usynystary mindetti túrde eskerilýge tıis», – dedi Máýlen Áshimbaev.
Sondaı-aq, Senat Tóraǵasy Qazaqstanda áleýmettik kásiporyndardyń qarym- qatynasyn retteıtin zańnamalyq bazanyń joqtyǵyn jáne memlekettik qurylymdar men áleýmettik kásipkerlik arasyndaǵy ózara is-qımyldyń qajetti deńgeıde emes ekenin atap ótti.
Máýlen Áshimbaev Senat janynan áleýmettik kásipkerlikti qoldaý jáne damytý máseleleri boıynsha zań jobasyn ázirleıtin jumys toby qurylatynyn aıtty. Bul jumys Májilispen birlesip iske asyrylady.
Kezdesýge qatysqan áleýmettik kásipkerler birqatar naqty usynystaryn jetkizip, salany damytýǵa qatysty óz oılarymen bólisti. Odan bólek, is-sharaǵa Ulttyq ekonomıka mınıstri Rýslan Dálenov, Eńbek jáne halyqty áleýmettik qorǵaý mınıstri Birjan Nurymbetov jáne Májilis depýtattary qatysty.
