Teatr • 08 Qazan, 2020

Qazanda oınaǵan «Naızaǵaı»

98 ret kórsetildi

Elordadaǵy eń kóne teatr – M.Gorkıı atyndaǵy akademııalyq orys drama teatry 120-shy mereıtoılyq maýsymyn ashty. Teatr shymyldyǵy A.Ostrovskıı­diń áıgili «Naızaǵaı» áleýmettik-psıhologııalyq dramasymen túrildi.

Elde beleń alǵan karantın rejımine qaramastan, teatrdy saǵynǵan kórermender qatarynda Mádenıet jáne sport mınıstri Aqtoty Raıymqulova men Nur-Sultan qalasynyń ákimi Altaı Kólginov te qart teatrdy mereıtoıymen quttyqtaı kelipti. Spektakl aldynda mınıstr el Prezıdenti Qasym-Jomart Toqaevtyń quttyqtaý hatyn oqyp berip, teatr qyzmetkerlerine memlekettik marapattar tabys etti. Atap aıtsaq, «Eńbek ardageri» medalin Qazaqstannyń eńbek sińirgen ártisi Natalıa Kosenkoǵa, «Mádenıet salasynyń úzdigi» Natalıa Matveevaǵa, Qazaqstannyń eńbek sińirgen ártisi, teatrdyń bas rejısseri Bekbolat Parmanovqa, «Mádenıet salasynyń úzdigi» tósbelgisin teatr dırektory Aıbolat Janǵalıulyna, akterler Ivan Anopchenkoǵa, Oksana Boıkoǵa, Igor Sedınge, óndiris bóliminiń bastyǵy Rýslan Muhamadıevke, bas ákimshi Tatıana Shýljenkoǵa, kadrlar ınspektory Janar Múbárakovaǵa tapsyrdy. Sonymen qatar birneshe teatr qyzmetkeri Mádenıet mınıstriniń jáne Nur-Sultan qalasy ákiminiń alǵys hatymen marapattaldy.

Bul jyl barlyǵymyz úshin ońaı bol­mady. Karantın rejimi adamdar­dyń qundylyq, adamı qarym-qatynas tur­ǵysyndaǵy oıyn túbegeıli ózgertti. Son­dyqtan da bárimiz ár sátimizdi baǵalaýdy úırendik. Memleketimizdiń ónerge degen sheksiz qamqorlyǵynyń arqasynda elimizdegi teatrlar shekteýli kórermendi qabyldap, jańa teatr maýsymyn ashyp, shyǵarmashylyq jumystaryn jalǵastyryp jatyr. Mine, sol óner ordalarynyń qa­tarynda 120 jyldyq tarıhy bar orystyń uly jazýshysy M.Gorkıı atyndaǵy aka­­demııalyq orys drama teatry da bar. 120 jyl! Az ýaqyt emes. Bir ǵasyrdan ar­tyq ýaqyt kórermenin rýhanı sýsyndatyp kele jatqan qarashańyraqtyń tarıhy shyn máninde taǵylymdy. Shejireli ujym­nyń shyǵarmashylyq izdenisteri artyp, kórkemdik deńgeıi ósip, laıym kórer­me­nin qýanta bersin», dep bas shahar ákimi ujym­dy jańa teatr maýsymynyń ashylýymen quttyqtap, shyǵarmashylyq tabys tiledi.

Merekelik maýsym odan ári A.Ostrov­skııdiń «Naızaǵaı» qoıylymyna ulas­ty. Spektakl Reseıden arnaıy shaqyryl­ǵan sankt-peterbýrgtik rejısser Racha Maha­taevtyń qoltańbasynda astanalyq kórer­menmen qaýyshqan bolatyn.

Eske sala keteıik, ótken maýsymda teatr ujymy barlyq sanıtarlyq talaptardy saqtaı otyryp, M.Makdonahtyń «Jastyq-adam» («Chelovek-podýshka»), N.Gogoldiń «Neke» («Jenıtba») sııaqty qoıylymdardy jaryqqa shyǵarsa, jańa maýsymdy A.Ostrovskııdiń «Naızaǵaı» («Groza») atty eń tanymal áleýmettik-psıhologııalyq dramasymen bastap otyr.

Ataqty spektakldiń sıýjeti kishken­taı kezinen ata-ananyń mahabbatynda ós­ken Katerına esimdi áıeldiń tragedııalyq taǵ­dyry týraly baıandaıdy. Turmys qur­ǵan soń ol kúıeýiniń úıinde eriksiz azap she­gedi jáne qaıyn enesiniń qatygezdigi men ozbyrlyǵynyń qurbany bolady. Ka­te­rınanyń ózin ózi óltirýi – narazylyq, aıqaı, meıirimdilikti suraý, jaqynyna degen súıispenshilik jáne keshirim bolyp tabylady. Kórermen A.Ostrovskıı jaz­ǵan klassıkalyq dramanyń bizdiń dáýiri­miz­degi ózektiligi men mańyzyn jańa zaman bed­e­rinde baǵalap, qabyldaı aldy.

Osy oraıda aıta keter bir jaıt, ujym­nyń mereıtoılyq maýsymashar qoıylym retinde Ostrovskıı dramatýrgııasyn tań­dap alýy tegin emes. Teatr tarıhyna dendesek, uly dramatýrg A.Ostrovskıı tarıh­qa ulttyq maǵynadaǵy orys teatrynyń reformatory jáne negizin qalaýshy retinde endi. Ol teatrǵa úlken tárbıelik mán berdi, sondyqtan ózin súıikti isine jan-tánimen arnady. Kórermender de óz zamanynda Ostrovskııdiń jańa pesalaryn yqylaspen qabyldady. Olar ózderiniń jańashyldyǵy men ómirsheńdigin sezindi. Ostrovskıı dramatýrgııasy jańa sahnalyq estetıkany, jańa akterlerdi talap etti. Sonysymen de Ostrovskıı mektebi teatr áleminen óz ornyn belgiledi.

Qoıylymnyń akterlik quramy Ostrov­skııdiń osy bir ıdeıasy men sara jolyna sáıkes joǵary deńgeıde óner kórsetti. О́ıtkeni munda tek obrazdy ǵana emes, sonymen qatar keıipkerlerge tán portretin jetkize alý da asa mańyzdy. Spektaklde oınaǵan Lıýdmıla Krıýchkova, Denıs An­nıkov, Sergeı Mashtakov, Ýlıana Shtıl­man, Maksım Iаshenko, Ekaterına Mak­sım, Aleksandr Lýkashevıch, Oksana Boı­ko, Danıl Homko, Dmıtrıı Mashtakov, Aıjuldyz Baǵlanova, Tatıana Stepanova, Evgenıı Karachov bastaǵan akterler oıy­ny shyn máninde talǵampaz kórermendi tánti etti.

Sońǵy jańalyqtar

Elordada Ulttyq Onim kórmesi ashyldy

Elorda • Búgin, 16:52

Dollar 425 teńgeni qurady

Qarjy • Búgin, 16:33

Aqtóbede jol apatynan eki adam qaza tapty

Aımaqtar • Búgin, 13:35

Uqsas jańalyqtar