Semeıde jáne Qaınar aýylynda ótken saltanatty sharaǵa ǵalymdardyń urpaqtarymen qatar Bolatbek Násenov, Baýyrjan Jaqyp, Janat Áskerbekqyzy, Dáýletkereı Kápuly, Serikzat Dúısenǵazın syndy syıly qonaqtar keldi.
Ǵalymdardyń eńbekteri týraly ótken konferensııada Semeı qalasy ákiminiń orynbasary Aıdar Sadyrbaev jazýshy Rymǵalı Nurǵalıevtiń atyna kóshe berý kerektigin aıtty.
– О́tken jyly qalalyq onomastıkalyq komıssııanyń otyrysynda Semeı qalasy kósheleriniń birine Rymǵalı Nurǵalıevtiń esimin berý týraly sóz qozǵalǵan. Biraq moratorıı jarııalanǵandyqtan kidirip turǵan. Qazir ruqsat berilip jatyr. Endi qolǵa alamyz, – dedi qala ákiminiń orynbasary Aıdar Sadyrbaev.
Bul – óte oryndy másele. О́ıtkeni Semeı rýhanı qala bolǵanymen, Rykov, Shors, Tereshkova, Morozov syndy kósheler áli bar.
Sondaı-aq jıynda sóz alǵan fılologııa ǵylymdarynyń doktory Baýyrjan Jaqyp marqum ǵalymdardyń eńbekterin aıta kele, Abaıdyń ustazy Janaq aqyn týraly da oı aıtty. Baýyrjan О́mirjanulynyń aıtýynsha, Janaq Saǵyndyquly Abaıdyń aqyn bolyp qalyptasýyna zor yqpal etken adam. Alaıda hakimniń ustazy týraly esh jerde aıtylmaıdy.
Ertesinde bir top delegasııa burynǵy Abyraly aýdanynyń ortalyǵy Qaınar aýylyna attandy. Mundaǵy ortalyq alańda «Abyraly-Degeleń» qorynyń qoldaýymen Rymǵalı Nurǵalıuly men Tóltaı Balaqaevtyń eskertkishteri ashyldy.
Tóltaı Balaqaev – Abyraly óńirinen shyqqan alǵashqy ǵalymdardyń biri. Ol ómir-baqı Sh.Ýálıhanov atyndaǵy ınstıtýtta qyzmet atqarǵan. Al Rymǵalı Nurǵalıuly – Alash qaıratkerleri týraly tyń derekter jınastyryp, qazaqtyń tarıhyn túgendegen ǵalym. Olardyń artynda qalǵan urpaqtary týǵan jerlerinde tuǵyryna qonsyn degen nıette keýdemúsin ornatýdy qolǵa alǵan. Ertis Tátıevtiń qolynan shyqqan bul músinder «Abyraly-Degeleń» qoǵamdyq qorynyń qoldaýymen ornatyldy. Judyryqtaı jumylǵan Abyraly óńiriniń týmalary is-sharany eldegi jaǵdaıǵa baılanysty barlyq sanıtarlyq talaptardy saqtaı otyryp uıymdastyrdy.
SEMEI
