Jambyl oblysynda paıdalanatyn aǵyn sý resýrstarynyń 80 paıyzy – kórshiles Qyrǵyz Respýblıkasynyń aýmaǵynan bastaý alyp, Shý, Talas transshekaralyq ózenderi arqyly beriledi. Senator oblysta sýarmaly jerdiń kólemi 229 700 gektar ekenin aıta kelip, júzege asyp jatqan aýqymdy sharalarǵa qaramastan, sýmen kamtamasyz etý máseleleri óte ózekti ári shekaralas memlekettiń sý saıasatyna táýeldi bolyp qalǵanyn málimdedi.
«QAZSÝShAR» Respýblıkalyq memlekettik kásiporny Jambyl fılıalynyń málimeti boıynsha 2020 jyly jalpy aýdany 122 myń ga bolatyn 1025,0 mln tekshe metr sý úshin aýylsharýashylyq taýar óndirýshilerimen sý jetkizý týraly kelisim jasaǵan. Alaıda, bıylǵy sáýir aıynan qyrkúıek aıyna deıin 79,6 myń gektar alqap 550,3 mln tekshe metr sýmen qamtamasyz etilgen. Jospardy oryndamaýdyń basty sebebi transshekaralyq kózderden keletin sýdyń jetispeýshiligi.
Qazirgi tańda Jambyl oblystyq aýyl sharýashylyǵy basqarmasy mamandarynyń esebi boıynsha 2020 jyldyń vegetasıalyq kezeńinde sý kóleminiń tómen bolý saldarynan oblysta barlyǵy jalpy quny 1 mlrd 300 mln teńgeni quraıtyn 36,4 myń tonnadan astam ónim alynyp, sharýalardyń kúnkóris deńgeıiniń tómendeýi oryn alyp otyr.
Senator Á.Nuralıev osy aıtylǵan máselelerdi eskere otyryp, Úkimet basshysyna óńirdegi transshekaralaryq Shý, Talas ózenderiniń sý qorlaryn eki memleket arasynda bólýge baılanysty birqatar usynysyn joldady. Onda:
- Qyrǵyz Respýblıkasy aýmaǵyndaǵy sý qoımalarynan elimizdiń sý tutynyshylarynyń táýeldiligin azaıtý maqsatynda Jambyl oblysy aýmaǵynda Shý, Talas ózenderiniń boıynda josparlanǵan 3 jańa sý qoımasynyń qurylysyna 2021 jylǵa arnalǵan Respýblıkalyq bıýdjetten qarjy bólý;
- Qazaqstan Respýblıkasy men Qyrǵyz Respýblıkasy arasyndaǵy kelisim negizinde retteletin memleketaralyq sý kanaldary arqyly sý berýdiń kelisilgen kestelerin oryndaý boıynsha tetikter qurý, kelisimderdi pysyqtaý;
- Shektes memleketterden keletin sý resýrstarynyń kólemin monıtorıngteý, sýdy keshendi paıdalaný men qorǵaýdyń basseındik shemalaryn naqtylaý, jańartý boıynsha sıfrlandyrý sharalaryn qabyldaý kerek ekeni aıtylǵan.
Senat depýtaty qalyptasqan jaǵdaıdyń mańyzdylyǵyna baılanysty usynystardyń eskerilýin jáne Qazaqstan Respýblıkasy Úkimeti tarapynan tıisti sharalar qabyldaýdy surady.
Depýtattyq saýalǵa Senat depýtattary Á.Nuralıev, Q.Qojamjarov, Á.Mamytbekov, B.Orynbekov qol qoıdy.
