– Semınar joǵary kásibı deńgeıde ótti, aqparat qoljetimdi ári aýdıtorııaǵa beıimdelgen túrde usynyldy, problemanyń barlyq aspektileri qozǵaldy jáne barlyq suraqqa jaýaptar usynyldy. Álemdik tájirıbede qoldanylyp kele jatqan ınternetke táýeldilikti anyqtaý metodıkalarymen jumys isteý baǵyttary kórsetildi. Balalarmen jáne onyń ata-analarymen jumys isteýge ádistemelik nusqaýlyqtar berildi. Aldaǵy ýaqytta mektep psıhologteri alǵan bilimderin mindetti túrde óz jumystarynda qoldanady dep senemiz, – deıdi Almaty qalasy №5 mektep-gımnazııasynyń psıhologteri.
Semınarda psıhologııa ǵylymdarynyń kandıdaty, «Kommýnıkasııa jáne ulttyq qaýipsizdik ǵylymı-zertteý ınstıtýty» JShS jetekshi treneri, «Kásibı psıhologııalyq lıga» qoǵamdyq birlestiginiń basqarma múshesi, «Qurmet» ordeniniń ıegeri Sáýle Izbasarova, krızıs jaǵdaıyndaǵy psıholog, dıagnost, konsýltant, vıktımıolog, ekspert, medıator Álııa Baıdrahmanova, tájirıbeli psıholog, psıholog-konsýltant Lımana Qoıshıeva, psıhologııa ǵylymdarynyń magıstri, Halyqaralyq bıznes ýnıversıtetiniń dosenti, Kásibı psıhoterapııalyq lıganyń jeke terapevti jáne múshesi Aınur Qulnazarova, psıholog, geshtalt-terapevt Alına Asadıllaeva sekildi bilikti trenerler óz tájirıbelerimen bólisti.
Semınar qatysýshylaryna tulǵa tıpterin psıhoanalıtıkalyq dıagnostıkalaý, balalar men jasóspirimderdegi ınternetke táýeldilikti anyqtaý boıynsha ádisti túsindirý, balalar men jasóspirimder jáne olardyń ata-analarymen ınternetke táýeldiliktiń aldyn alý boıynsha pedagog-psıhologtiń korreksııalyq jumysy boıynsha aqparattar berildi.
Sonymen qatar aǵymdaǵy jyldyń 18 qyrkúıegi kúni «Máskeý metropolıteni» MÝK medısınalyq qyzmetiniń 1-kategorııaly psıhofızıologi barlyq qatysýshylarǵa qosymsha dáris ótkizdi. Leksııa youtube beınehostınginde 12 myńnan asa kórilimmen qaraldy.
Joba uıymdastyrýshylary mamandardyń alǵan bilimin aldaǵy ýaqytta tájirıbe júzinde tıimdi paıdalanýy úshin jyl sońyna deıin semınar qatysýshylaryna saraptamalyq qoldaý kórsetilip otyratynyn jetkizdi.
Túrli zertteýlerdiń nátıjesi boıynsha álem halqynyń 10%-y ınternetke táýeldi ekeni anyqtalǵan. Japonııa, AQSh, QHR sııaqty birqatar elde bul dert medısınalyq sanatqa jatqyzylyp, odan arylý úshin kásibı mamandar kómek kórsetedi.
Elimizde atalǵan másele resmı túrde medısınalyq aýrý retinde tirkelmese de, derttiń bary anyq. Osy oraıda «Jas ulan» uıymy Aqparat jáne qoǵamdyq damý mınıstrligi jáne «Azamattyq bastamalardy qoldaý ortalyǵy» KeAQ qoldaýymen «Jastar men balalar arasynda ınternetke táýeldiliktiń aldyn alý jónindegi is-sharalar keshenin iske asyrý, sondaı-aq azamattardyń sıfrly bedelin qorǵaý» jobasy aıasynda birqatar aýqymdy is-sharalardy júzege asyryp jatyr. Aldaǵy ýaqytta eldegi ınternetke táýeldilik jaǵdaıyn anyqtaý maqsatynda aýqymdy áleýmettik zertteý júrgizilmek.
