Qarııaǵa qýanysh syılady

«Oń qolyń bergendi sol qolyń kórmesin» deıdi ǵoı. Áleýmettik kómekke zárý otbasylarǵa azyq-túlik, dári-dármek taratyp júrgen jastar jaqsylyqtaryn tis jaryp eshkimge aıta bermeıdi. Úlken isti úndemeı tyndyryp júr. Áıtpese azyn-aýlaq azyq-túlik alyp baryp, sýretke túsip, jarııaǵa jar salatyndar da joq emes. Al Erasyl Ýataev bastaǵan jastardyń qart anaǵa bas­pana alyp berýge sep bolǵandary aıtýǵa turarlyqtaı. Jaqsylardyń jaqsylyǵy ǵoı.

Bıyl jazdaı bir top qamqor jandar orta qazanǵa qarjy jınap, ál-aýqaty tómen otbasylarǵa kómek qoldaryn sozǵan. Birde Erasyl Ýataev, Islam Áýelbek syndy jas­tar belgilengen tizimmen azyq-túlik taratyp júrip, baspana keıpi joq úıde turyp jatqan aq jaýlyqty anaǵa tap bolǵan. Páter jaldaýǵa jaǵdaıy joq Kúlpara Ysqaqova úlken balasy men joldasy qaıtys bolǵan soń qalaǵa kishi ulynyń qolyna kóship kelgen. О́kinishtisi sol, kishi uly aıaqasty sottalyp ketken. Qart ana bolsa, kómek surap eshqaıda barmaǵan. Úısiz-kúısiz bes jylǵa jýyq júrgen. Ulyna baryp júrý úshin eden jýyp, nápaqa tapqan. Alpys myń teńgeniń aınalasyndaǵy zeınetaqymen О́skemendeı qalada ómir súrý múm­kin emes edi. Ananyń osyndaı kúıin baıqaǵan Erasyl birden aqsha jı­naýǵa kirisken.

– Áleýmettik jaǵdaıy tómen otbasylarǵa azyq-túlik taratyp júrip, Kúlpara apamyzben tanystyq. Turyp jatqan jeri bireýdiń qosalqy bólmesi eken. Úı dep aıtýǵa kelmeıdi. Sodan jan-jaqqa habarlap, anaǵa qamqorlyǵymyzdy kórsetkimiz keldi, – deıdi Erasyl Ýataev.

Qart ananyń jaı-kúıine kózderi jetken halyq Erasyldyń kishi-girim qoryna aqsha aýdara bastaǵan. Aınaldyrǵan eki aptanyń ishinde eki mıllıonǵa jýyq qarjy jınalǵan. Jalyndy jstar qordaǵy aqshaǵa saı О́skemennen baspana izdeı bas­taıdy. Kóp uzamaı páter tabyla ketken. Qýanyshtaryna oraı páter ıesi de ananyń jaǵdaıyn túsi­nip, kóp jeńildik jasaǵan eken. Bas­panaly bolǵan qarııaǵa volonter jastar jıhazdaryn da satyp alyp ber­gen. Tipti páterin jýyp-shaıyp, anany ózderi kóshirip alyp kel­gen. Jyly úıde turyp jatqan Kúl­para Ysqaqovanyń jastarǵa degen alǵysy sheksiz. Igi istiń basy-qa­syn­­da júr­gen Jastar resýrstyq or­ta­­lyǵynyń jetekshisi Araılym Esim­­bekqyzy da meıirimdi, aqyldy jas­tardyń ósip kele jatqanyn aıtady.

– Bıyl asabalar men jaıdar­manshylardyń paıdasy halyqqa kóp tıdi. Karantın engizilgende biz­diń ortalyqqa alǵashqy bolyp habarlasqan da solar. Biri qar­jy­laı qoldaý bildirse, ekinshisi muq­taj otbasylarǵa azyq-túlikti kólik­­terimen tasymaldap berdi. Or­tamyzda osyndaı jastardyń bary marqaıtady, qýantady, – deıdi Jas­tar resýrstyq or­ta­lyǵynyń jetekshisi Araılym Esimbekqyzy.

Qoldarynan kelgenshe jan-ja­ǵyna jylý syılap júrgenderdi biz bálkim baıqaı bermeımiz. Biraq qam­qor jandar az emes.

О́skemen