Sońǵy táýlikte Qazaqstan boıynsha 94 adamnan dert anyqtalsa, onyń 17-si Shyǵys Qazaqstan oblysynan shyqqan. Qazir aýrýhanada em alyp jatqan naýqastar úshin qajetti jaǵdaıdyń bári jasalǵan. Yqtımal ekinshi tolqynǵa da daıyndyq tyńǵylyqty júrip jatyr. Oblys ortalyǵynda ashylǵaly otyrǵan pýlmanologııalyq ortalyqtyń ózi turǵyndar úshin úlken qýanysh.
Aty jaman indetpen kúreste halyq ta aıanyp qalyp jatqan joq. Jýyqta ǵana Rıdder qalasynyń 27 turǵyny qan plazmasyn tapsyrdy. Al ótken aıda 11 azamat plazma tapsyryp, aýyr jaǵdaıda jatqan naýqastarǵa kómek qolyn sozǵan edi. Qan plazmasyn tapsyrǵandardyń barlyǵyna 19 446 teńge kólemindegi tıisti soma tólenip otyr. Sóıtip qazirgi ýaqytta Rıdder qalasynda 81 qan plazmasy daıyn tur.
– Bir adam tapsyrǵan qan plazmasy, kem degende, aýyr jaǵdaıda jatqan eki adamnyń ómirin aman alyp qalatynyna báriniń kózi jetti dep oılaımyn. Sondyqtan bir aýyryp, aıyqqan azamattardy plazma tapsyrýǵa shaqyramyz. Qan tapsyrýǵa kelgenderdi eń aldymen terapevt dáriger muqııat qarap, tekseredi. Ol pasıenttiń qan qysymy men dene qyzýyn ólsheıdi. Eger bári durys bolsa, qan tapsyrý apparatyna jiberiledi, – deıdi Rıdder ortalyq aýrýhanasynyń bas dárigeri Gúlnar Kitapbaeva.
Qan tapsyrýǵa nıetti rıdderlikter keńes berý dıagnostıkalyq ortalyǵyndaǵy №15 kabınetke barýǵa bolady.
Donorlardyń esine sala ketsek, kez kelgen adam qan tapsyra almaıdy. Bul úshin adamnyń salmaǵy 50 kılodan kem bolmaýy kerek. Jas mólsheri 18 ben 55 jas aralyǵyndaǵy azamattar ǵana qan tapsyra alady. Dárigerlerdiń aıtýynsha, jasy ulǵaıǵan adamdarda qant dıabeti, arterııalyq gıpertenzııa, júrek aýrýy syndy sozylmaly aýrýlar bolady. Taǵy bir eskererligi, qan apparattyq plazmaferez arqyly daıyndalatyndyqtan donordyń bilegindegi kúre tamyry anyq bolǵany abzal. Qan aldymen kúre tamyrdan ıne arqyly alynyp, arnaıy apparatqa túsedi. Medısına mamandary apparatpen qandaǵy plazmany bólip alady da, qannyń kletkasyn qysymmen donorǵa qaıta quıady. Densaýlyǵyńyz, jas mólsherińiz joǵaryda atalǵan talaptarǵa saı kelse, qan tapsyryp, beıtanys adamnyń ómirine arasha túsýińizge múmkindik bar.
Shyǵys Qazaqstan oblysy
