Batyrdyń aty óshpeıdi

Taıaýda UQK Shekara akade­mııasynyń Qaraoıdaǵy dala­lyq oqýdy qamtamasyz etý basqar­ma­synda, munan keıin Almaty oblysy boıynsha departamentiniń Qarasaı aýdany boıynsha shekara bas­qarmasynda ótken is-sha­ralar – batyr shekarashy Rad­jan Ba­tyrhanovtyń rýhyna taǵ­zym etýge arnaldy. Al atal­ǵan sharalardy shekarashy arda­gerlerdiń «Zastava tarlandary» respýblıkalyq qoǵam­dyq uıy­mynyń Almaty qalasy jáne Almaty oblysy boıynsha fılıaly uıymdastyrdy.

1994 jyly óziniń Otan aldyn­­daǵy boryshyn sol kezdegi Kúr­shim shekara otrıadynyń «Shyń­dyǵataı» shekara zastavasynda atqaryp júr­gen jerinen ózi suranyp, tájik-aýǵan shekarasyna attanǵan Rad­jan­dy alda aýyr urystyń kútip turǵanyn eshkim bilmek túgili sezbegen de edi.

1994 jyldyń 28 qyrkúıegi kúni eki júzden astam muzdaı qarýlanǵan modjahed TMD-ǵa múshe mem­lekettiń, ıaǵnı Tájikstannyń oń­tústik shekarasyn buzyp kiredi de Horog qalasynyń aýmaǵyna qa­raı bet alady. Osy sátte toǵyz avtólikke mingen modjahedterdiń jolyna qazaqstandyq jáne re­seılik shekarashylar qarsy tu­rady da, qorǵanysqa yńǵaıly tóbe úshin qaqtyǵys bastalyp ketedi. Osy urysta reseılik leıtenant Vladımır Selıýk pen qazaqstandyq shekarashy Radjan Ba­tyrhanov tóbeni alý úshin dush­panmen erlershe arpalysady. Alaıda leıtenant aýyr jaralanady da, Radjan komandırin jaýdyń jańbyrsha tópelegen oǵynyń astynan alyp shyǵady. Sosyn qol pýlemetimen atysty jalǵastyrǵan ol bólimsheniń qolaıly jerge ornyǵyp alyp, modjahedterge tyl jaǵynan soqqy berýge múm­kin­dik jasaıdy. Osy urysta óziniń áskerı boryshyna meılinshe adal qazaq eliniń óreni qaza tabady.

Sodan beri aradan syrǵyp 26 jyl ótti. Osy jyldardyń ishin­de batyr shekarashynyń erli­gin ulyq­taýǵa arnalǵan sharalar az bolǵan joq. Batyr shekarashy Qazaqstan Respýblıkasy Prezıdentiniń Jar­lyǵymen II dárejeli «Aı­byn» ordenimen marapattalyp, 2000 jyly onyń esimi qazirgi Kúrshim aýdany boıyn­sha shekara basqarmasynyń «Shyńdyǵataı» shekara bólim­shesine berildi. Sonymen qatar Tá­jikstan eliniń astanasy Dýshanbe qalasyndaǵy kóshe men mektep Radjan Batyr­hanovtyń atymen atalady. Buǵan jyl saıyn Radjan týyp-ósken Shyǵys Qazaqstan óńirindegi Katon­qaraǵaıda ótip kele jatqan is-sharalar men batyr atyndaǵy kósheni de qosýǵa bolady.

UQK Shekara aka­de­­mııa­sy­nyń dalalyq oqýdy qam­tama­syz etý basqarmasynda ótken sharaǵa «Zastava tarlandary» respýblıkalyq qoǵamdyq uıy­mynyń Almaty oblystyq fı­lıalynyń tóraǵasy, zapastaǵy polkovnık A.Dýbovpen birge «Tá­jik-aýǵan shekarasyndaǵy ja­ýyngerlik urystarǵa jáne áskerı qaqtyǵystarǵa qatysýshy ardagerler odaǵynyń» Almaty oblystyq fılıalynyń tóraǵasy, zapastaǵy podpolkovnık Marat Dosybaev, tájik-aýǵan shekarasynda Saryózek rotasyn bas­qarǵan zapastaǵy polkovnık Asqar Izbanov, merzimdi qyz­mettiń aǵa serjanty Almas Talı­povtar qatysty. Olar – osydan tup-týra 26 jyl buryn 28 qyr­kúıekte bolǵan qaqtyǵysty kózderimen kórip qana qoımaı, Radjan Batyrhanov sııaqty batyr shekarashynyń arqasynda jaýǵa tyl jaqtan soqqy berýshilerdi basqarǵan jáne sol qaqtyǵysqa belsene qatysqan ardagerler.

Basqosýǵa qatysýshylar esimi Shekara qyz­metiniń tarıhyna altyn árip­pen jazylǵan batyr Radjan týraly áriden áńgime qozǵap, kýrsanttardy erlik­ke úndedi. Ásirese Qorǵanys mınıs­trliginiń Saryózekte jasaqtalǵan rotasyn basqarǵan zapastaǵy polkovnık A.Izbanov pen onyń orynbasary bolǵan podpolkovnık M.Dosybaevtardyń aıtary az bol­ǵan joq. 1994 jyldyń 28 qyr­­kúıeginde jaýmen bolǵan qaq­ty­ǵysta shekarashylardyń qaı­sar­lyq­tary men tabandy áre­ketteri jaıynda estelikter aıtty.

Al Almaty oblysy boıynsha departamentiniń Qarasaı aýdany boıynsha shekara basqarmasynda ótken ekinshi is-sharaǵa zapastaǵy polkovnık A.Dýbovpen birge shekarashy ardagerlerdiń Almaty qa­la­syndaǵy fılıalynyń tór­aǵasy, zapastaǵy general-maıor M.Májıtov qatysty.

Aıta ketý kerek, toqsanynshy jyldary tájik-aýǵan shekara­synda erlikpen qaza tap­qan qazaq­standyq áskerı qyzmet­shilerge qoıylǵan eskertkish Shekara qyz­meti bo­ıyn­sha tek atalǵan ujymda orna­tylǵan. Sondyqtan jyl saıy­n 7 sáýir – erlikpen qaza tap­qan Ult­tyq ulannyń 17 sarbazyn eske alý úshin tájik-aýǵan she­kara­synyń ardagerleri osynda jına­lyp, Radjan Batyrhanov bastaǵan batyrlarymyzǵa taǵzym etýdi dástúrge aınaldyrǵan.

Zapastaǵy general-maıor Marat Májıtov sharanyń ma­ńyzyna erekshe toqtalyp ótken soń eskertkishke gúl shoqtaryn qoıý rásimi de bastaldy. Gúl shoqtary salynǵan sebetti kótergen qos shekarashy bastaǵan top qaza tap­qandarǵa áskerı qurmet kórsetti.

Iá, boılarynda patrıottyq rýhtary bar óskeleń urpaq barda batyrlarymyzdyń aty óshpeıdi. Solardyń biri Radjannyń jasaǵan erligi – shekarashylardyń Otan úshin otqa túsýge daıyn ekeniniń aıǵaǵy.

Tamara DÁÝLETBAEVA,

UQK Shekara qyzmetiniń zapastaǵy podpolkovnıgi