Osy jobanyń alǵashqy habaryna Evgenııa Dovgıalo esimdi kelinshek qatysqan edi. Ol karantın kezinde jumysynan aıyrylypty. О́zi eki balanyń anasy. Jeti jyl birge turǵan kúıeýi araqqa salynyp, otbasynan múlde ketip qalǵan. Balalaryna qarasýdy oıyna da almaıdy eken. Tipti alıment suraǵan áıeline qoqan-loqy jasap, «Eger mundaı suraq qoıatyn bolsań úıińdi órtep jiberemin», dep qorqytqan.
Turatyn jerleri jyldar boıy jóndeý kórmegen eski jataqhana. Syz ıisinen aýasy da aýyr. Sýy da jıi bolmaı qalady. Osyndaı qıyn jaǵdaıda qalǵandyqtan Evgenııa úlken qyzyn Mamlıýtka qalasyndaǵy ınternatqa berýge májbúr bolypty. Balasyn saǵynǵannan júregi qan jylaıtyn jas ana uzaq túnderdi de uıqysyz ótkizip júr eken. Sonyń bárin tok-shoýda shybyn jany shyrqyrap, kóziniń jasyn kóldetip aıtyp bergen anaǵa jany ashymaǵandar kemde-kem shyǵar.
Qoly uzyn adamdar arasynda janashyr jandar bar eken. Evgenııa Dovgıalonyń basyndaǵy aýyrtpalyqty kórgen petropavldyq kásipkerlerdiń biri oǵan bir bólmeli páter satyp áperipti. Muny shyn kóńilinen istep, tipti óziniń aty-zatyn kórsetýdi de qalamaǵan. Qarip jandarǵa satyp alǵan úıiniń burynǵy qojaıynynan jıhazdaryn da túgel alyp beripti. Tipti kóshi-qonǵa kólik jaldaýǵa aqsha da bergen. Osyndaı jandardyń bar ekenin kórgende ómirge qulshynys ta arta túsetin sııaqty. Al endi Evgenııa Dovgıalonyń aýzyna alǵystan basqa sóz túspeıdi. Eki ezýi eki qulaǵyna jetip qýanǵan ol kishi qyzy Margarıtany qushaqtap, kózi botalap tek alǵysyn aıta beredi. Endigi maqsaty – ınternatqa bergen úlken qyzyn qaıtarý. Bul úshin áleýmettik qyzmetkerler kelip Dovgıalonyń turmysyn kórip, baǵasyn berýleri kerek. Qazir jas ana olardy asyǵa kútip otyr. Al tili jańa shyqqan kishi qyzy belgisiz aǵaıdy «on horoshıı» dep maqtaı berýden jańylar emes. Endi she... Basqalar da kórip qyzyqqan kóptegen oıynshyq, qýyrshaqtarmen «jaqsy aǵasy» ózin ábden baıytyp ketipti.
Júregi jyly, jany jomart osyndaı jaqsy aǵalar aman bolsyn.
PETROPAVL
