Qazaqstan quramasynyń bas bapkeri Mıhal Bılek qyrkúıekte ótken oıynǵa qaraǵanda bul joly negizgi quramǵa azdaǵan ózgeris jasaǵanyn baıqadyq. Birinshi matchta Bılek 3-4-3 taktıkasyn qoldanyp, kóbirek shabýylǵa kóńil bólgen edi. Al keshegi oıyn aldynda negizgi quramnyń tizimin jarııalaǵanda cheh mamany kerisinshe, qorǵana otyryp shabýylǵa shyǵatynyn ańǵartty. О́ıtkeni syrt alańdaǵy oıynda 5-3-2 taktıkasyn ustandy. Bas bapkerdiń qorǵanysqa bes fýtbolshyny qoıǵanyn eskersek, Belarýs eline jeńis úshin emes, eń quryǵanda teń nátıje kórsetýge barǵan syńaıly. Alaıda onyń Belarýske qoldanǵan taktıkasy nátıje bermedi.
Jalpy Bılek osy eki taktıkany jıi qoldanatynyn jaqsy bilemiz. О́ıtkeni keıingi tórt matchtaǵy oıyn júıesin qarasańyz, ol únemi osy eki taktıkany kezek-kezek ózgertip otyrǵan. Onyń tek ekeýi ǵana nátıje berdi. Birinshisi – alǵashqy týrda syrt alańda Lıtvamen (2:0), ekinshisi – óz alańymyzda Albanııamen (0:0) ótken oıyn. Lıtvada 3-4-3 taktıkasymen jeńiske jetkenin bilemiz. Al Almatydaǵy kezdesýde 5-3-2 júıesin qoldanyp, Albanııamen teń túsken edi.
Biraq Belarýspen ótken kezdesýde Bılektiń birinshi kezekte qorǵanysqa kóbirek mán berýden basqa amaly qalmaǵan-dy. Sebebi Albanııamen ótken oıynǵa deıin de, keıin de negizgi quramdaǵy birneshe fýtbolshymyz qatardan shyǵyp qaldy. Atap aıtar bolsaq, qorǵaýshylar Iаn Vorogovskıı men Nuráli Álipten koronavırýs indeti tabylsa, sol qaptaldaǵy qorǵaýshy Ǵafýrjan Súıimbaev sary qaǵazynyń kóptigine baılanysty quramaǵa kómektese almady. Sondaı-aq jaraqatyna baılanysty komanda kapıtany Baýyrjan Islamhan, Iýrıı Persýh, shabýylshylar Alekseı Shıotkın jáne otbasylyq sebeppen Maksım Fedın Belarýske barǵan joq.
Matchta bes qorǵaýshymen oınaǵan Qazaqstan quramasy kezdesýdi jaqsy bastady. Kóp shabýyldy eki qaptal arqyly uıymdastyryp, qarsylastardy eki jaqtan qyspaqqa aldy. Alǵashqy qaýipti shabýyldy sol qaptaldan Tımýr Dosmaǵambetov uıymdastyryp, komandaǵa aıyp dobyn oryndaýǵa múmkindik jasady. Alaıda Ashat Taǵybergenniń tepken doby qaqpadan da, bizdiń fýtbolshylardan da áldeqaıda bıik ketti. Kezdesýdiń 9-mınýtynda jerlesterimiz buryshtama dobyn oryndaýǵa múmkindik aldy. Jalpy qazaqstandyq fýtbolshylar goldy oıyn sátinde emes, osyndaı standartty jaǵdaıda jıi soǵatynyn jaqsy bilemiz. Áıtkenmen, bul oıynda jerlesterimizge standartty jaǵdaı bylaı tursyn, gol soǵý baqyty buıyrmady. 15-mınýtta B.Zaınýtdınovtyń gol soǵatyn tamasha múmkindigi bolyp edi. Alaıda alystan shirene tepken doby Belarýs qaqpashysyna esh qıyndyq týdyra qoıǵan joq. Reseıdiń SSKA klýbynda oınaıtyn fýtbolshymyzdyń budan bólek te gol soǵatyn sáti bolǵanymen, eshbirin júzege asyra almady.
Oıyn budan keıin eki ujymnyń alma-kezek shabýylymen órbidi. Sondaı sáttiń birinde qazaqstandyq qorǵaýshylardyń nazarynan tys qalǵan Belarýs fýtbolshysy Evgenıı Iаblonskıı gol soǵyp ketti. Alańda júrgen 5 qorǵaýshymyzdyń beseýi de Iаblonskııdiń gol soǵýyna kedergi keltire almady. Bálkim, Belarýspen ótetin kelesi oıyndarda 6 qorǵaýshymen oınaý kerek shyǵar!
2 taımda da qazaqstandyq fýtbolshylar Belarýs quramasynyń qaqpasy aldynda birneshe qaýipti shabýyl uıymdastyrǵanymen, shabýyldy túıindeıtin birde-bir fýtbolshynyń tabylmaǵany qynjyltty. Áıtpese, Ashat Taǵybergen, Abat Aıymbetov, Baqtıer Zaınýdtınovtarda gol soǵatyn bir emes, birneshe múmkindik boldy. Osydan keıin fýtboldaǵy «Sen soqpasań, saǵan soǵady» degen qaǵıdany ustanǵan alań ıeleri 93-mınýtta oıyndaǵy ekinshi golyn salyp ketti. Bul joly Roman Iýzepchýk Belarýs jankúıerlerine qýanysh syılady. Qorytyndy esep – 2:0.
Tablodaǵy kórsetkish kóńilimizdi túsirgenimen, bizdiń jigitter nashar oınady dep aıta almaımyz. Bir-birine pas asyryp dop ustaý, kombınasııalyq shabýyl uıymdastyrý jaǵynan da qarsylasymyzdan kem túsken joq. Tek shabýyldy sońyna deıin jetkizip, gol soǵatyn fýtbolshy tabylmady. Qaqpashy Stas Pokatılovtyń da eńbegin atap ótpeýge bolmas. Kezdesý barysynda birneshe seıv jasap, qaqpamyzdy goldan aman saqtap qaldy. Aıtpaqshy, keshegi oıynda Belarýstiń «Rýh» komandasynda óner kórsetetin jerlesimiz Vladıslav Vasılev ulttyq quramadaǵy alǵashqy oıynyn ótkizdi. Debıýtti matchy bolǵan soń ba, Vasılev azdap qobaljyp, kútkendegideı kózge túse alǵan joq. Bálkim, aldaǵy oıyndarda ózin jaqsy qyrynan kórsetip qalar dep úmittenemiz.
Qoryta aıtqanda, Belarýs qazaq fýtbolshylary úshin alynbas qamalǵa aınaldy. Búginge deıin eki ujym jasyl alańda bes ret kezdesti. Tórteýinde «aqorystar» jeńis toıyn toılasa, bir kezdesýde teń oınadyq. Onyń ózi resmı emes, joldastyq kezdesý bolatyn.
Toptaǵy ekinshi oıynda Lıtva óz alańynda Albanııa quramasyn qabyldap, 0:0 esebimen teń tarqasty. Tek Qazaqstanǵa ǵana jol bergennen keıin Baltyq jaǵalaýy eliniń ókili qalǵan matchtaryn táýir ótkizip júr. Keıinnen Albanııany syrt alańda jeńse, keıingi eki kezdesýde (Belarýs, Albanııa) teń tústi. Nátıjesinde týrnır kestesindegi sońǵy orynnan ekinshi satyǵa kóterilip aldy. Albanııa fýtbolshylary Ulttar lıgasyn sátti bastaǵanymen, keıingi oıyndarda upaı joǵaltyp júr. Sáıkesinshe týrnır kestesinde úshinshi orynǵa túsip qaldy.
Al tórt oıynnyń tek bireýinde ǵana jeńilip, qalǵan úsh oıynda upaı ıelengen Belarýs quramasy topta jeke-dara kósh bastady. Tórtinshi týrǵa deıin birinshi orynda turǵan Qazaqstan keshegi jeńilisten soń sońǵy orynǵa bir-aq syrǵydy. Áli alda eki týr bar. Eger eki oıynda da jerlesterimiz jeńiske jete almasa, kelesi jyly joǵary topqa qosylýdyń ornyna, byltyr ǵana óner kórsetken D lıgasyna túsip qalýy ábden múmkin.
