Mundaı mýral ázirge Qazaqstanda bireý ǵana. Onyń ereksheligi sonda – ol keramıkalyq plıtalardan qurastyrylǵan. Mundaı plıtalar 830 gradýstyq ystyqta qaqtalǵan, temirden de tózimdi. Olardan ónim jasaýdyń ózi úlken tehnologııalyq prosessterden turady. Qyzyljarda ony almatylyq sýretshi – sheber Bolat Áserbekov jasap shyqty. Uly aqynnyń portreti de aınymaı túsirilgen. Onyń jan-jaǵy ásem oıý-órnektermen bezendirilgen. «Endi bul pano-mýral uzaq jyldar boıy qalanyń kórki bolyp turatyn bolady. Biz qala turǵyndaryna uly Abaıdy tanystyrýmen qatar onyń beınesinen estetıkalyq lázzat alsyn degen maqsatpen keramıkadan osy kórikti sýretti saldyrdyq», dedi oblys ákimi Qumar Aqsaqalov onyń ashylý saltanatynda.
Jaman indetke baılanysty shekteýli adamdar ǵana qatysqan saltanatta sóılegen ǵalym Zarqyn Taıshybaı da, oblystyq ardagerler alqasynyń tóraǵasy Eskendir Eleýsizov, ólketanýshy Jaqsybaı Samrat ta mýraldyń kelbetine rızashylyqtaryn bildirdi. Sonymen birge osy keramıkadan QR-kodtar arqyly Abaıdyń shyǵarmalaryn oqýǵa bolady. Mýraldyń osyndaı erekshelikterin bilgen turǵyndar ony qyzyǵa tamashalaýda.
Aıta ketetin jaıt, qala ákimi Bolat Jumabekov qyzmet istegen jerleriniń bárinde osyndaı tamasha ister qaldyryp keledi. Buǵan deıin ol Ǵ.
Músirepov aýdanynyń ákimi bolǵanda Maǵjan Jumabaevqa tamasha eskertkish ornatqan edi. «Artyńda mal qalmasyn, tal qalsyn» degendi ol júregine bek tutqan sııaqty.
QYZYLJAR
