Oblystyń bas memlekettik sanıtarııalyq dárigeriniń orynbasary Gúlaıym Tagaeva óńirdegi koronavırýs ınfeksııasy boıynsha sanıtarııalyq-epıdemııalyq ahýaldy saralaı kele, balalar arasynda da syrqattanýshylyq jaǵdaılarynyń tirkelýin anyqtaǵan. Sońǵy málimet boıynsha, Nur-Sultan qalasynda 19 jaǵdaı tirkelse, Shyǵys Qazaqstan oblysynda 11 adamnan koronavırýs ınfeksııasy anyqtalǵan.
«Shyǵys Qazaqstan oblysynyń aýmaǵynda 2020 jylǵy 17 qazandaǵy saǵat 00.00-den bastap 2020 jylǵy 31 qazandaǵy saǵat 00.00-ge deıin sharýashylyq jáne (nemese) ózge de qyzmetpen jáne halyqtyń tynys-tirshiliginiń erekshe jaǵdaılarymen shekteý sharalary engizilsin» dep jazylǵan qaýlyda.
Qaýlyda kórsetilgendeı, shekteý is-sharalarynyń rejimi men merzimi oblys aýmaǵynda COVID-19 koronavırýs ınfeksııasynyń taralýy boıynsha ahýaldyń ózgerýine sáıkes qaıta qaralýy da múmkin.
Endi otbasy múshelerin qospaǵanda, kópshilik demalatyn oryndarǵa jeke nemese 3 adamnan aspaıtyn toppen ǵana barýyńyz kerek. Sondaı-aq senbi, jeksenbi, mereke kúnderi júrip-turýǵa shekteý qoıyldy. Iаǵnı oıyn-saýyq, sporttyq is-sharalardy, mıtıngilerdi, kórmelerdi, forýmdardy, sonymen qatar otbasylyq toı-tomalaqty, as berýdi ótkizý shekteldi.
Al oblys aýdandary men qalalary arasynda qalaaralyq avtobýs jolaýshylar tasymalynyń jumys isteýine tyıym salyndy. Eldi mekenniń ishindegi qoǵamdyq kólikterde júrgizýshiler, kondýktorlar jáne jolaýshylar mindetti túrde maska taǵýlary qajet. Kólikte maska kııýdi tasymaldaýshylar men kondýktorlar qadaǵalaıdy.
Qaýlyda kórsetilgendeı, jabyq bazarlardyń jumysy saǵat 17.00-ge deıin bolsa, ashyq jerlerdegi bazarlar 18.00-ge deıin jumys isteıdi.
Medısınalyq ortalyqtar, stomatologııalar, avtojýý oryndary, avtomobılderge tehnıkalyq qyzmet kórsetý jáne jóndeý stansalary, turmystyq tehnıkany jóndeý oryndary jáne halyqqa qyzmet kórsetetin basqa da mekemeler sanıtarlyq talaptardy saqtaı otyryp qyzmetterin jalǵastyra beredi. Jumystaryn jýyqta ǵana bastaǵan teatrlar da jabylmaıdy. Tek kelýshiler 50 adamnan aspaýy kerek. Onyń ózinde shahmat tártibimen ara qashyqtyqty saqtap otyrady.
Alda-jalda respıratorlyq ınfeksııanyń alǵashqy belgileri paıda bolsa, medısınalyq uıymǵa barmaı-aq, jedel medısınalyq kómekti úıge shaqyrǵanyńyz abzal.
Eskerte keterligi, oblystyń bas memlekettik sanıtarlyq dárigeriniń qaýlysy aıasyndaǵy shekteýlerdiń barlyǵy quzyrly organdardyń qadaǵalaýynda bolady. Eger sanıtarlyq talaptar buzylsa, shara qoldanylady.
Shyǵystaǵy shekteý sharalaryna qatysty tolyq málimetti www.gov.kz saıty arqyly oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń paraqshasynan kórýge bolady.
Shyǵys Qazaqstan oblysy
