«Oqjetpes» – «Qyzyljar» – 2:1
13-týr oıyndarynyń shymyldyǵyn chempıonatta jan saqtap qalýdyń qamyna kirisken eki aýtsaıder komanda ashyp berdi. Eń keıingi jeńisine 26 tamyzda qol jetkizgen Kókshetaýdyń «Oqjetpes» klýby óz alańynda Petropavldyń «Qyzyljar» komandasyn qabyldady. Matchta teriskeılikter esepti birinshi bolyp ashqanymen, kezdesý sońynda qarsylastaryna ese jiberdi. «Qyzyljar» klýby da 30 tamyzdan beri jeńistiń ne ekenin bilmeı kele jatyr.
Birinshi taımnyń 43-mınýtynda Shota Grıgalashvılı «Qyzyljardy» alǵa shyǵarsa, ekinshi taımda eki gol soqqan «Oqjetpes» mańyzdy úsh upaıyn ıelendi. Goldardyń avtorlary – Darko Zorıch pen Artem Dmıtrıjev. Match barysynda «Oqjetpes» fýtbolshylary belsendi oınady jáne jeńiske degen senimi olardy alǵa jeteledi. Kókshetaýlyqtar bul oıynda týrnır kestesindegi basty qarsylasyn jeńip qana qoımaı, ýaqytsha qaýipti aımaqtan shyqty.
«Taraz» – «Qaısar» – 2:2
«Ońtústik derbıinde» «Qaısar» klýbyn qabyldaǵan «Taraz» kezdesýdiń birinshi taımynda eki gol soǵyp, oıynda ústemdik tanytty. Alaıda matchtyń ekinshi 45 mınýtynda Vladımır Nıkıtenkonyń shákirtteri oıyndaǵy basymdyqty saqtaı almaı, qaqpalaryna eki gol ótkizip aldy. Byltyr «Tarazdyń» namysyn qorǵaǵan, bıyl «Qaısar» klýbynda dop tebetin Elgýdja Lobjanıdze óziniń burynǵy klýbynyń qaqpasyn eki márte dál kózdep, qazirgi komandasyna teń nátıje syılady.
«Shahter» – «Ordabasy» – 0:1
Chempıonatta joǵary oryndarǵa qol jetkizýdi kózdeıtin Shymkenttiń «Ordabasy» klýby maqsatyna taǵy bir mańyzdy qadam jasady. Qaraǵandynyń «Shahterimen» úsh upaıdy sarapqa salǵan shymkenttikter qıyndyqqa tap bolsa da, jeńiske jetti. «Ordabasynyń» brazılııalyq «djokeri» Joao Paýlo oıyndaǵy jalǵyz ári jeńisti goldy soqty. Onyń aıyp alańynyń ishinen jasaǵan soqqysy «Shahter» qorǵaýshylarynyń birine tıip, dop qaqpa tórinen tabyldy. «Ordabasy» bul jeńisten keıin 21 upaımen úshinshi orynǵa kóterildi. Al «Shahter» 16 upaımen altynshy orynda qala bermek.
«Jetisý» – «Qaırat» – 2:4
Týrdyń tartysty ári eń kóp gol soǵylǵan kezdesýi atalǵan eki komanda arasynda ótti. Alty gol soǵylǵan oıynda eki 11 metrlik aıyp doby oryndaldy jáne eki fýtbolshy qyzyl qaǵaz alyp, alańnan qýyldy. Kezdesýdi sátti bastaǵan «Jetisý» 20 mınýtta eki gol soǵyp, esepte alǵa shyqty. Bir qyzyǵy, eki gol da «Qaırat» fýtbolshylarynyń qateliginen keıin soǵyldy. Dese de birinshi taım sońyna deıin «qalalyqtar» Abat Aıymbetovtiń soqqan golynyń arqasynda esep aıyrmasyn qysqartýǵa múmkindik aldy.
Birinshi taım sııaqty ekinshi taımda kórermender úsh goldyń kýási boldy. Alaıda úsh goldy da «Qaırat» oıynshylary soqty. Abat Aıymbetov dýbldiń avtory atansa, «Qaırattyń» belarýs qorǵaýshysy Denıs Polıakov pen 19 jastaǵy shabýylshy Danııar Úsenov chempıonattaǵy tuńǵysh golyn soqty. Ekinshi taımda «Jetisý» klýbynyń eki oıynshysy tártipsizdigi úshin alańnan qýylyp, komandalastaryn qıyn jaǵdaıda qaldyryp ketti. 60-mınýtta shabýylshy Mıram Sapanov ekinshi sary qaǵazyn alsa, 94-mınýtta Aslan Darabaev qyzyl qaǵazben jazalandy.
«Kaspıı» – «Tobyl» – 0:1
О́z deńgeıindegi komandalarǵa qaraǵanda, chempıondyqqa úmiti bar klýbtarǵa ońaılyqpen upaı bermeıtin Aqtaýdyń «Kaspııi» bul joly da ádetinen jańylǵan joq. О́tken týrda elimizdiń alty dúrkin chempıony «Astana» klýbynan aılasyn asyrǵan (2:1) «Kaspıı» bul týrda chempıondyqtan basty úmitker komandalardyń biri sanalǵan Qostanaıdyń «Tobylyna» laıyqty qarsylyq kórsetip, ábden áýreledi. Qostanaılyqtar match boıy basymdyq tanytyp, sát saıyn shabýylǵa shyqqanymen «Kaspıı» qorǵanysyn biraz ýaqytqa deıin buza almady. Tek ekinshi taımnyń orta tusyna kelgende ǵana «Tobyl» standart jaǵdaıyndaǵy múmkindigin paıdalanyp ketti. Kezdesýdegi jalǵyz ári jeńisti goldy 70-mınýtta Sergeı Malyı soqty. Azat Nurǵalıevtiń buryshtamadan asyrǵan pasyn Malyı golǵa aınaldyrdy. Osy jeńistiń arqasynda «Tobyl» 23 upaı jınap, týrnır kestesinde «Astana» men «Ordabasydan» (ekeýi de – 21) ozyp, ekinshi orynǵa kóterildi. «Qaırat» kósh basynda (32 upaı), al «Kaspıı» sońǵy orynda (7 upaı) qalyp qoıdy.
