Buryn-sońdy bolmaǵan mundaı batyl bastamany Qorqyt ata atyndaǵy Qyzylorda ýnıversıtetiniń ǵalymy, aýyl sharýashylyǵy ǵylymdarynyń kandıdaty Samalbek Qosanov qolǵa alyp otyr. Jurtshylyq qyzyǵýshylyq tanytqan jańa ónim keptirilgen baqsha daqylynan jasalady. Sondyqtan ol ónim – ekologııalyq turǵydan taza.
Áý basta tabıǵı ónim atalǵan oqý ornynyń zerthanasynda daıyndalypty. Til úıirgen tyń tájirıbe, rasynda da, oń nátıje berse kerek. Ázirshe, qaýyn-qytyrlaq eki túrli pishinde kópshilikke usynylady dep josparlanýda.
Al ol qalaı daıyndalady degenge kelsek, aldymen pisken qaýyn muqııat tazalanyp, sodan soń juqa tilikterge tilinip, úshinshi kezeńinde daıyn bólikter 12 saǵattan asa ýaqyt keptiriledi eken. Kásipkerdiń sózine sensek, erekshe dámnen aýyz tıgen jandar bul ónimniń turaqty tutynýshysyna qalaı aınalǵandyqtaryn ózderi de bilmeı qalatyn sııaqty.
Jalpy alǵanda, Syr óńirinde qaýyn sharýashylyǵy jaqsy damyǵan, sondyqtan shıkizat máselesinde irkilis bola qoımas dep otyr is bastaǵandar. Joba tolyq júzege assa, ǵalymdar táýligine 300-500 kılo qaýyn chıpsysyn óndirýdi josparlap otyr. Aldaǵy ýaqytta qytyrlaq qaýyn óndirisin ulǵaıtý úshin zamanaýı keptirý qondyrǵylaryn alý da oıda bar.
Buǵan deıin de baqsha daqyldaryna túrli tájirıbe jasap júrgen ǵalym-kásipker «Bıznestiń jol kartasy-2020» memlekettik baǵdarlamasyna qujattaryn tapsyryp, 2 mln 500 myń teńge qaıtarymsyz qarajatqa da ıe bolyp úlgergen edi. Endi ol jańa kásibiniń kókjıegin odan ári keńeıtýge kúsh salmaq.
Amangeldi QIIаS,
«Egemen Qazaqstan»
