Budan basqa, kórermender elordalyq teatrda opera premerasyna ázirlený júre bastaǵan sátten bastap «Abaı» operasynyń ańyz bolǵan qoıylymynyń tarıhyn baıandaıtyn ártisterdiń debıýtterimen, sondaı-aq teatrdyń aýqymdy gastrolderi kezindegi fotoeksponattarmen tanysa alady. Máselen, «Astana Opera» ártisteriniń oryndaýyndaǵy aıtýly qoıylymnyń arqasynda, alys-jaqyn shetel kórermenderi qazaq halqynyń kemeńger tulǵasymen jaqyn tanysýǵa múmkindik aldy.
– Hakimniń sahnadaǵy kórkem beınesine arnalǵan bul kórme arqyly biz kórermenderdiń uly oıshyldyń ómiri men shyǵarmashylyǵyna degen qyzyǵýshylyǵyn arttyrǵymyz keledi. Ekspozısııanyń ashylý kúninde Úlken zal sahnasynda «Abaı» operasy qoıylady. Qazaq aqynynyń taý tulǵasy – óz maǵynasynda dáýir aýysýy kezindegi, ıaǵnı ótkenimiz ben erteńimizdi sabaqtastyryp turǵan «altyn kópir» tárizdes nyshandy qubylys. Munyń barlyǵyn Qazaqstannyń Tuńǵysh Prezıdenti Nursultan Nazarbaev óziniń «Abaı amanaty» atty maqalasynda aıtqan bolatyn. Elbasy halqymyz úshin Abaı bizdiń aınymas temirqazyǵymyz bolǵanyn, bolyp ta qala beretinin birneshe márte aıryqsha atap ótti, – dedi «Astana Opera» teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov.
Al kostıým sýretshisiniń aıtýynsha, aıtýly aýqymdy spektaklge arnalyp 200-den astam kostıým tigilipti. Olardy daıyndaý kezinde tabıǵı jibekten bastap perdelik matalarǵa deıingi túrli materıal paıdalanyldy. Kostıýmder boıynsha sýretshi olarmen jumys jasaý kezinde arnaıy ádebıetterge, sondaı-aq kitaphanalar men murajaılardan tapqan tarıhı fotolardyń kóshirmelerine súıendi. Bir qýanarlyǵy, ózimiz qoıylym barysynda kýá bolǵandaı, ıtalııalyq sahna mamany Franko Skýarchapıno qazaq mádenıetiniń tereńine boılaý arqyly ulttyq kıimniń barlyq bólshekterin sátti aıshyqtaı aldy, aıaq-kıimderdiń, bas kıimderdiń bederli oıýlaryna, bezendirilgen áshekeılerge erekshe nazar aýdara bildi. Ár kostıýmge matanyń asa zor talǵampazdyqpen arnaıy tańdalýy jáne oıý-órnek hám tús úılesiminen-aq bilikti kásibı mamannyń jumysy ekendigin birden ańǵarýǵa bolady.
«Astana Opera» teatrynda Muhtar Áýezovtiń lıbrettosyna jazylǵan spektakldiń premerasy 2015 jylǵy 25 qyrkúıekte ótti. Qoıylymnyń mýzykalyq jetekshisi – teatrdyń bas dırıjeri, Qazaqstannyń eńbek sińirgen qaıratkeri, Memlekettik syılyqtyń laýreaty Alan Bóribaev, qoıýshy rejısseri – Djankarlo del Monako (Italııa). Keńesshi-rejısser – Qazaqstannyń Halyq ártisi Esmuqan Obaev. Bas hormeıster – Qazaqstannyń eńbek sińirgen qaıratkeri Erjan Dáýitov. Qoıýshy rejısserdiń assıstenti – Erenbaq Toıkenov. «Astana Opera» teatrynyń shyǵarmashylyq ujymy 2018 jyly «Abaı» operasynyń qoıylymy úshin Ádebıet jáne óner salasyndaǵy Qazaqstan Respýblıkasynyń Memlekettik syılyǵyn aldy.
Teatr basshylyǵy málim etkendeı, segizinshi teatr maýsymynda túrli baǵyttaǵy kórmeler jıi uıymdastyrylady. Iаǵnı teatr ákimshiliginiń ekspozısııany turaqty túrde ótkizip turý jospary bar. Máselen, kelesi uıymdastyrylatyn kórme Maıra Muhamedqyzynyń shyǵarmashylyǵyna arnalatyn bolady jáne aıtýly shara opera juldyzynyń jeke konsertiniń aıasynda ótedi. Demek, bul tamasha dástúr aldaǵy ýaqytta da jalǵasyn tabady degen sóz. Endigi usynylatyn kórmeler mazmuny negizinen operanyń, balettiń jetekshi solısteriniń jáne barlyq shyǵarmashylyq ujymnyń jetistikterine arnalyp, olardyń spektaklderi kezinde usynylatyn bolady.
