Boks keshiniń shymyldyǵyn 2019 jylǵy álem chempıony Bekzat Nurdáýletov pen 28 jastaǵy tanzanııalyq Ibragım Maokola ashyp berdi. Kásipqoı boksta 24 jekpe-jek ótkizgen Maokola onyń 14-inde jeńiske jetip, toǵyzynda qarsylasyna jol bergen. Bir kezdesýinde teń túsken. Asa tájirıbeli boksshy dep sanalǵan tanzanııalyq 22 jastaǵy otandasymyzǵa tek eki raýndqa shydap berdi. Nurdáýletov eki raýndta da qarsylasyn bir retten nokdaýnǵa túsirip, ekinshi raýndtyń sońynda aýyr soqqysymen sulatyp saldy.
Sondaı-aq osy boks keshinde baq synaǵan álem chempıonatynyń eki dúrkin qola júldegeri Abylaıhan Júsipov alty raýnd qorytyndysy boıynsha tanzanııalyq Meshak Mvakenvany tize búktirdi. Aıta ketelik, Tokıo Olımpıadasyna daıyndalý maqsatynda bapkerler Júsipov pen Nurdáýletovtiń kásibı boksta baq synaýyna múmkindik bergen bolatyn.
