Sýretterde: polısııa maıory Rýslan Bekbolatov; ýchaskelik ınspek- tor Qadyrbek Isın
Ýchaskelik ınspektordyń bedelin arttyrý úshin olarǵa joǵary bılik, atap aıtqanda Ishki ister mınıstrligi tarapynan qoldaý jasalýy kerek-aq. Áıtpese, quqyq qorǵaýdyń tek qara jumysymen ǵana aınalysatyn jandar kózge iline qoımaıdy. Prezıdent Joldaýyndaǵy talaptan keıin mınıstrlik tarapynan osy iske mán berile bastady. Sonyń biri retinde mınıstrdiń ózi qatysqan jıyndarǵa olardyń shaqyrylýynan kórýge bolady. Jýyrda soltústikqazaqstandyq ýchaskelik polısııa ınspektory Rýslan Bekbolatov IIM keńeıtilgen alqasynda ózine merziminen buryn berilgen maıor ataǵyn mınıstr, general-leıtenant Erlan Turǵymbaevtyń óz qolynan aldy. Alqa otyrysyna Prezıdent Qasym-Jomart Toqaevtyń ózi de qatysqan edi. Otyrysta ýchaskelik ınspektorlardyń aldynda turǵan mindetter aıtylyp, jańa talaptar jetkizildi. «Bul ataq men úshin aıryqsha boldy. Mınıstrdiń óz qolynan pogon alǵanda qýanyshtan qatty tolqydym. Osy otyrysta bizdiń qyzmetimiz úshin jańa múmkindikter ashylǵanyn bildik. Basty mindetimiz – qylmystardyń aldyn alý. Endi bizdiń fýnksııamyzǵa jatpaıtyn basqa jumystar bizge júktelmeıtin shyǵar degen úmittemiz», dedi ol óziniń sózinde.
Rýslan Bekbolatov Taıynsha aýdany Abaı aýyldyq okrýginde ýchaskelik ınspektor bolyp qyzmet isteıdi. Ýchaske halqynyń sany 1400-ge jýyq adam. Jyl basynan beri munda tórt urlyq jasalyp, olar Rýslan Bekbolatovtyń qatysýymen barlyǵy izi sýymaı ashyldy. Onyń ustanymy – ýchaskelik polısııa ınspektorlary óziniń ýchaskesin tolyqtaı bilýi tıis.
Ýchaskede túrli oqıǵalar bolyp turady. Birde oǵan ákesin uryp jatqan buzaqyny ustaýǵa týra keldi. Ishimdikke toıyp alǵan balasynyń qolynda pyshaq bolǵan. R.Bekbolatov oǵan qaramaı qaskúnemniń qolyn qaıyryp, pyshaqty tartyp alǵan. Biraq osy buzyqtyń aýyl sharýashylyǵy kásipornyna jumysqa qabyldanýyna da kómektesken. Qazir ol R.Bekbolatovty kórgende kádimgideı qýanyp qalady. «Polısııanyń mindeti – adamdarǵa kómektesip, qoldaý kórsete otyryp, quqyqtyń buzylýyna jol berilmegenin qadaǵalaý. Alqa otyrysynda adamdardy birjaqty kinálaýǵa jol berilmeýi kerektigi aıtyldy», deıdi polısııa maıory.
Jalpy, atalǵan otyrysqa Soltústik Qazaqstan oblysynan úsh úzdik ýchaskelik polısııa ınspektory qatysty. Olardyń qatarynda bolǵan ýchaskelik polısııa ınspektory, polısııa maıory Qadyrbek Isın Mamlıýt aýdanyndaǵy Prıgorodnyı selolyq okrýginde qyzmet etedi. «Men jıynnan ómir boıyma jeterlik áser aldym. Ásirese ýchaskelik ınspektorlardyń qyzmettik mindetterin jetildirý boıynsha aıtylǵan usynystar meniń de oıymnan shyqty. Sonyń ishinde bizdi ózimizge tán emes mindetterden bosatý máseleleri óte oryndy dep sanaımyn. Bizdiń mindetimiz qyzmet kórsetetin aýmaqta qylmystyń aldyn alý bola tura, kez kelgen jumystarǵa bizdi jegý ádetke aınalǵan. Mysaly, áskerge shaqyrýshylardy komıssarıatqa jetkizý men basqa da mindetterdi oryndaýdan bizdiń qyzmetti bosatý usynyldy», degen oıymen bólisti polısııa maıory.
Ýchaskelik ınspektorlardyń kútetin jańalyqtarynyń arasynda turmystyq zorlyq-zombylyqty bolǵyzbaýdyń joly bolyp tabylatyn resimderdi ońtaılandyratyn zańnamadaǵy ózgerister. Bıyl Qadyrbek Isınge otbasylyq janjalǵa qatysty 7 isti sotqa daıyndaýǵa týra kelgen. Mundaı jumys birneshe kúnge sozylady, keıde zaıa ketetin jaǵdaılar da bolady. О́ıtkeni áıelderi jubaılarynyń ýádelerine senip, jazǵan aryzdaryn keri qaıtaryp alady. Otyrysta otbasyndaǵy zorlyq-zombylyq faktileri boıynsha tatýlastyrý rásimi men eskertý túrindegi ákimshilik jazany alyp tastaý usynylǵan. Sondaı-aq muraǵa qalǵan turǵyn úıdiń qujattaryn resimdeý, kúıeýimen ajyrasý resimi, ózge de birneshe máseleler boıynsha ýchaskelik ınspektorǵa fýnksıonaldyq mindetinen tys jumystar júkteledi eken. Prıgorodnyı selolyq okrýginde 1043 adam bar, barlyǵynda da quqyqtyq máseleler týyndaýy múmkin, ár jaǵdaıǵa túsinistikpen qarap, aýyldyqtarǵa kómektesýge tyrysý qajet dep sanaıdy Qadyrbek Isın.
Soltústik Qazaqstan oblysy
