«Elordadaǵy Botanıkalyq baq erekshe qorǵalatyn tabıǵı aýmaqqa jatady. Onyń maqsaty – ósimdikterdiń jańa túrlerin ósirip, osyndaǵy aýa-raıyna beıimdeý.Sondyqtan bul jerde tek ǵylymı-zertteý jumystary júrgiziledi. Birde-bir qurylys jumysy júrmeıdi», - dedi ol jýrnalısterge bergen suhbatynda.
Al Nur-Sultan qalasynyń ákimdigi habarlaǵandaı, sport ortalyǵy saıabaqtyń jasyl jelegi joq bóligine, ıaǵnı Botanıkalyq baqtyń joǵarǵy bóligine salynady. Joba qalanyń bas josparyna sáıkes keledi.
«Botanıkalyq baqtyń jalpy aýmaǵy 89,1170 gektar desek, onyń 42,9 gektary Nur-Sultan qalasy ákimdigine qarasty parktiń aýmaǵyna jatady. Al 46,3 gektar jer mınıstrlikke qaraıdy. Iаǵnı, baqtyń aınalasy qalanyń kommýnaldyq menshiginde bolǵandyqtan nysan turǵyzý máselesin ákimdik sheshedi. Jalpy syrttan ákelingen ósimdikterdi qolaısyz aýa raıynan, qystyń aıazynan qorǵaý maqsatynda osyndaı konsepsııa tańdalyp, botanıkalyq baqtyń tórt jaǵy aǵashtar egilgen parkpen qorshaldy. Iаǵnı, qazir botanıkalyq baqtyń yq jerde turǵany durys», - dep túsindirdi vıse-mınıstr.
Erlan Nysanbaev baqtyń ákimdik qarasty bóligine sport nysany turǵyzylǵanymen, shý týdyratyn oıyn-saýyq ortalyqtary sekildi ǵımarattardyń salynýyna jol berýge bolmaıtynyn jetkizdi.
«Dúnıejúzilik tájirıbege qarasaq, osydan 25-30 jyl buryn botanıkalyq baqtarda eshqandaı tirshilik jasaýǵa bolmaıdy degen uǵym bolatyn. Al qazir qaı memlekette de botanıkalyq baqtar halyqtyń demalatyn ornyna aınaldy. Iаǵnı rekreasııa úshin de qoldanylady. Ondaı mysaldardy Eýropadan, Amerıkadan, Taıland sııaqty ońtústik-shyǵys Azııa elderinen kórýge bolady. Árıne, kelýshiler de mádenıetti saqtap, qoqys tastamaýǵa, lastamaýǵa, qatty sóılemeı aralaýǵa tyrysýy kerek», - dep aıtty Erlan Nysanbaev.
Aıta keteıik, 2 qarasha kúni Nur-Sultan qalasynyń ákimdigi Botanıkalyq baqtyń jasyl jeleksiz bóliginde sport ortalyǵy salynatynyn habarlaǵan. Osyǵan baılanysty qarsy pikir bildirgen ekologııalyq belsendiler boldy.
