16-týr oıyndaryna sholý jasaǵanymyzda «Qaırattyń» kelesi týrda «Ordabasymen» kezdesetinin, eger osy oıynda almatylyqtar jeńiske jetetin bolsa merziminen buryn chempıondyqty toılaıtynyn jazǵan bolatynbyz. Muny sáýegeılik dep kólgirsimeı-aq qoıaıyq. Aıtpaǵymyz, Qazaqstan kásipqoı fýtbol lıgasynyń basshysy Oljas Abraev ta osy matchta chempıondyq anyqtalyp qalar degen úmitpen Almatynyń Ortalyq stadıonyna chempıondyq «altyn tabaq» pen fýtbolshylarǵa beriletin altyn medaldi ala barǵan eken. Sóıtip boljam dál kelip, match sońynda «Qaırat» komandasyn birden altyn júldesimen marapattady. Esterińizde bolsa, Oljas Abraev byltyr da «Astana» altynshy márte bas júldeni oljalaǵanda chempıondyq tondony Qostanaıǵa alyp barǵan-dy.
Ortalyq stadıondaǵy ótken kezdesýge toqtalar bolsaq, matchtyń alǵashqy jarty saǵaty teń dárejede ótti. Eki komanda gol soǵýdyń jolyn qarastyryp, biraz shabýyl uıymdastyrdy. Bul kezdesýde jeńis «Qaıratqa» qanshalyqty mańyzdy bolsa, «Ordabasyǵa» da úsh upaı aýadaı qajet edi. О́ıtkeni Shymkenttiń komandasy bıyl da úzdik úshtikten kórinip, kelesi jyly da Eýrokýbok básekelerine qatysýǵa nıetti. Alaıda komandalyq rýh, jeńiske degen jiger jáne fýtbolshylardyń jekeleı tájirıbesi jaǵynan «Qaırat» komandasy qarsylastarynan bir bas joǵary boldy. Nátıjesinde, matchtyń esebin oıynnyń 36-mınýtynda «Qaırattyń» brazılııalyq shabýylshysy Vagner Lav ashty. Arada 3 mınýt ótkende «Ordabasy» fýtbolshylary óz aıyp alańynda ereje buzǵan soń, bas tóreshi esh oılanbastan «Ordabasy» qaqpasyna penaltı belgiledi. 11 metrlik aıyp dobyn sátti oryndaǵan Nuraly Álip komandasynyń ekinshi golyn soǵyp, oıynnyń esebin eseleı tústi. Qonaqtar úziliske deıin esep aıyrmasyn qysqartýǵa qansha tyrysqanymen, shabýyldary sátsiz aıaqtalyp jatty. Komandalar úziliske 2:0 esebimen shyqty.
Birinshi taımda eki dop basymdyǵyna ıe bolǵan «Qaırat» oıynshylary ekinshi taımdy óte sylbyr bastady. Sóıtip 77-mınýtta «Ordabasy» komandasynyń brazılııalyq shabýylshysy Joao Paýlo «Qaırat» qaqpashysy Stas Pokatılovty qapy qaldyryp, esep aıyrmasyn qysqartty. Bul – Joao Paýlonyń chempıonattaǵy 11-goly. Osy golynyń arqasynda ol el birinshiligindegi surmergender tiziminde kósh bastady. Biraq «Ordabasynyń» qýanyshy uzaqqa sozylmady. Alań ıeleri bul golǵa kóp uzamaı-aq jaýap qatty. Oıynnyń 80-mınýtynda Neboısha Kosovıch áriptesterine asyrǵan dopty qaıtaramyn dep umtylǵan «Ordabasynyń» oıynshysy Ular Jaqsybaev abaısyzda óz qaqpasyna gol soǵyp aldy. Bul – shymkenttik klýbtyń osy maýsymdaǵy tórtinshi avtogoly.
«Ordabasy» klýbyn 3:1 nátıjesimen jeńgen «Qaırat» bul oıynnan keıin chempıonattaǵy týrnır kestesinde 44 upaı jınap, merziminen buryn chempıon atandy. Osylaısha, «Qaırat» bıyl 16 jyldan (2004) keıin birinshi márte altyn júldege qol jetkizip qana qoımaı, keıingi alty jylda alty ret chempıon atanǵan «Astanany» «taqtan» qulatty. Osylaısha, «Qaırat» óz tarıhynda úshinshi márte el chempıony degen mártebeli ataqqa ıe boldy.
Matchtan keıin «Qaırattyń» bas bapkeri Alekseı Shpılevskıı chempıondyqqa qalaı qol jetkizgeni týraly aıtyp berdi. «Árıne, uzaq kúttirgen chempıondyq ataqqa qol jetkizgenimizge qýanyshtymyn. Ásirese, klýb prezıdenti Qaırat Boranbaev úshin. О́ıtkeni ol maǵan senim bildirip, komandaǵa shaqyrdy. Al men sol senimdi aqtaı aldym dep oılaımyn. Qazaqstanǵa kele sala «Qaıratpen» birge birden chempıon bolamyn degen senim bolǵan joq. Biraq klýbtaǵy alǵashqy jumys kúninen bastap jigitterge qalaı da chempıon bolýymyz kerek ekenin túsindirip, sol maqsatqa jetýimiz úshin barymyzdy saldyq. Mine, eki jyldyq jumysymyzdyń jemisin kórip otyrmyz. Biz bıylǵy chempıondyqqa laıyq óner kórsettik dep oılaımyn», deıdi bas bapker. Taǵy bir aıta keterligi, Alekseı Shpılevskıı – Qazaqstan chempıonatynyń tarıhynda altyn júldeni jeńip alǵan eń jas jattyqtyrýshy. 32 jastaǵy Belarýs mamany osylaısha ishki chempıonattyń tarıhyna ózgeris engizdi.
Qazirgi tańda áleýmettik jelide «Qaırattyń» chempıondyǵyna baılanysty fýtbol mamandary men jankúıerleriniń pikiri ekige jarylǵan. Birinshi tarap pandemııaǵa baılanysty barlyq match Almatyda ótken soń «Qaırat» óz alańynda oınap, basymdyqqa ıe boldy. Bir-eki oıyndy esepke almaǵanda barlyq kezdesýin jasandy alańda ótkizip, chempıondyqqa qol jetkizdi dep esepteıdi. Al ekinshi tarap oıyndardyń bári bir qalada ótti demesek, barlyq komandaǵa birdeı jaǵdaı jasalǵan degen qarsy ýájderin aıtýda. Sondaı-aq «Astananyń» bıylǵy sátsizdigine jáne chempıon atana almaǵanyna klýbtyń ishki jaǵdaıy áser etti deıdi.
Endi ishki chempıonatta bas júldeni ýysynan shyǵaryp alǵan «Astana» barlyq kúsh-jigerin qalaıda ekinshi oryndy ustap qalý úshin jumsaıtyny anyq. Alaıda «Tobyl» men «Ordabasy» da «aı qarap» turmaıtyny belgili. Sondyqtan birinshilikte chempıondyq báıgege qaraǵanda, ekinshi jáne úshinshi oryn úshin ótetin talas tartysty bolaıyn dep tur. Byltyr úshinshi orynǵa taban tiregen Shymkenttiń «Ordabasy» klýby «Qaırattan jeńilgennen keıin 27 upaımen tórtinshi orynǵa túsip qaldy.
Sondaı-aq osy týrda «Qaısardyń» qaqpasyna jaýapsyz úsh gol soǵyp, jeńiske jetken qostanaılyqtar 29 upaımen týrnır kestesinde ekinshi orynǵa kóterilip aldy. Kezdesýdegi goldardy Senın Sebaı (53-mınýt), Jeremı Manzorro (58-mınýt) jáne Samat Jarynbetov (77-mınýt) soqty. Gazet bettelip jatqanda «Astana» «Taraz» klýbymen kezdesip jatqan bolatyn. Osy oıynnyń nátıjesin esepke almaǵanda, «Astana» 27 upaımen úshinshi orynda tur. Biraq elordalyqtar «Tobylǵa» qaraǵanda eki oıyn kem ótkizgen.
