Qazir eń kúrdeli jobalardy qarjylandyrýǵa daıyn
Keshe «Qazaqstannyń damý banki» AQ-ta baspasóz konferensııasy bolyp ótti. Bankte 2010-2013 jyldar aralyǵynda atqarylǵan jumystar qorytyndylandy. Sondaı-aq, banktiń basqarma tóraǵasy Nurlan Qusaıynov osy aıdyń 25 juldyzynan bastap basqa qyzmetke aýysatyn bolǵandyqtan ýákilettigin merziminen buryn toqtatatyndyǵyn jarııalady.
Qazir eń kúrdeli jobalardy qarjylandyrýǵa daıyn
Keshe «Qazaqstannyń damý banki» AQ-ta baspasóz konferensııasy bolyp ótti. Bankte 2010-2013 jyldar aralyǵynda atqarylǵan jumystar qorytyndylandy. Sondaı-aq, banktiń basqarma tóraǵasy Nurlan Qusaıynov osy aıdyń 25 juldyzynan bastap basqa qyzmetke aýysatyn bolǵandyqtan ýákilettigin merziminen buryn toqtatatyndyǵyn jarııalady.
Konferensııaǵa Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev, «Báıterek» ulttyq basqarý holdınginiń basqarma tóraǵasy – QDB dırektorlar keńesiniń múshesi Qýandyq Bıshımbaev, banktiń táýelsiz dırektory Ýolf Vokýrka, QDB basqarma tóraǵasy Nurlan Qusaıynov qatysty. Sharany banktiń táýelsiz dırektory júrgizdi. Ol Qazaqstan damý bankiniń maqsat-mindeti men qyzmeti týraly aıta kelip, birinshi sóz kezegin banktiń dırektorlar keńesiniń tóraǵasy Áset Isekeshevke berdi.
«Elimizde júrgizilip jatqan ındýstrııalandyrý sharasy – memlekettik saıasatymyzdaǵy basym baǵyttardyń irgeli ári ilgerisi ekeni málim. Al osy Memlekettik údemeli ındýstrııalyq-ınnovasııalyq damý baǵdarlamasyn júıeli qarjylandyratyn jáne onyń basty operatorlarynyń biri Qazaqstannyń damý banki. Sondyqtan atalǵan banktiń jumysyn únemi júıelep otyrý óte mańyzdy. Birinshi aıtarymyz, 2010-2013 jyldar aralyǵynda bank el ekonomıkasyna 3 mlrd. dollardan astam qarjy saldy. Osy kezeńderde, elimizde jalpy quny 7 mlrd. dollar bolatyn 36 iri joba maquldanǵan. Damý banki osy jobalardy júzege asyrýǵa belsene qatysyp, olarǵa 4,3 mlrd. dollar quıypty. Bile-bilgenge bul asa aýqymdy jumys», dedi Premer-Mınıstrdiń orynbasary.
Qazirgi ýaqytta Qazaqstan damý bankiniń basty operatorlyǵymen dúnıege kelgen keshendi jobalarda 10 myńnan astam adam eńbek etip jatyr. Osydan úsh jyl buryn aıaǵyn endi ǵana táı-táı basqan banktiń az ýaqyttyń ishinde osyndaı bıik kórsetkishke qol jetkizýi, onyń basshylary men qyzmetkerleriniń qarjyny bilikti basqara bilýiniń nátıjesi. «QDB Memleket basshysy júktegen mindetterdi abyroımen atqaryp shyǵyp, banktiń tıimdiligi men korporatıvti basqarý qyzmetin jaqsy jetildire bilgenin de aıtqym keledi. Búginde damý banki halyqaralyq standarttardyń bárine saı qyzmet etip jatyr deýge tolyq negiz bar», – dep qorytyndylady sózin Á.Isekeshev.
«Báıterek» holdınginiń basshysy Q.Bıshımbaev QDB jumysyndaǵy kásibılikti joǵary baǵalady. Sóıtip, banktiń basqarma tóraǵasy N.Qusaıynovqa alǵysyn bildirdi. Holdıng basshysynyń sózine qaraǵanda, órkendeý jolyndaǵy bank búginde kommersııalyq ınstıtýttarǵa tartymdy emes, biraq elge asa qajet kez kelgen iri jáne qıyn jobany qarjylandyrýǵa daıyn kórinedi.
«Úsh jyl buryn bank pen onyń basshysy bolyp tabylatyn meniń aldymda birqatar maqsattar turdy. Shúkir, sol bıik maqsattardy ıgerip kelemiz. Nátıjesinde kóptegen aýyr jáne mańyzdy ózgeristerden óttik. Banktiń strategııasy túzeldi, mindettemelerdi basqarý jaqsardy. Qııýy qıyn jobalardy elimizdiń ınvestısııalyq qoryna tapsyrý men balansty tazalaý boıynsha biregeı mámile júrgizilip, bıznes úderisterdi ońtaılandyrý sharalary tıimdi qabyldandy», – dedi N.Qusaıynov.
Damý bankiniń búgini men keleshegi týraly áńgimelegen Ýolf Vokýrka, korporatıvti basqarýdyń joǵarǵy deńgeıin meńgergen banktiń dál qazir tórt aıaǵynan nyq turǵanyn jetkizdi. Konferensııanyń ekinshi bóliminde dırektorlar keńesiniń músheleri tilshilerdiń suraqtaryna jaýap berdi.
Nurbaı ELMURATOV,
«Egemen Qazaqstan».
